БНХАУ-аас өөрийн газар нутгийн салшгүй хэсэг гэж зарладаг Тайвань арал АНУ найман тэрбум доллараар 66 ширхэг F-16 сөнөөгч онгоц худалдахаар болсон тухай Пентагон мэдэгджээ. АНУ-ын Засгийн газар нь энэ наймааг "Тайвантай харилцах тухай" хуульд нийцэх төдийгүй бүс нутагт энх тайван, тогтвортой байдлыг бэхжүүлэхэд тус болно гэж үзсэн аж. Одоо энэ гэрээг АНУ-ын Конгресс баталгаажуулах ёстой. Эх газрын Хятад ба Тайвань арал хоорондын харилцаа ширүүсч эхэлсэнтэй холбоотойгоор арлын улсын эрх баригчид өнгөрсөн зургаадугаар сард Америкаас 2 тэрбум доллараар танк, танк эсэргүүцэгч пуужингийн систем худалдан авах тухай яригдаж байсан. БНХАУ нь үүнийг эрс эсэргүүцэж, Тайваньд зэвсэг нийлүүлэхээ зогсоохыг Америкаас шаардаад, зэвсэг нийлүүлсэнтэй холбоотойгоор үүсч болзошгүй бүх л асуудлыг Вашингтон хүлээнэ гэж сануулж байсан. Сануулгын хариуд хоёр бус бүр найман тэрбум долларын сөнөөгч онгоц зарахаар болж байгааг харвал Бээжингийн эсэргүүцэл, сануулгыг Вашингтонд хятадуудын хүсч байснаас огт өөрөөр хүлээж авсан бололтой. Америкийг Тайванд сөнөөгч онгоц зарахаар болсны хариуд Америкийн бараа бүтээгдэхүүний эсрэг хориг арга хэмжээ авах тухайгаа Хятадын тал мэдэгдсэн байна.
Сэтгэгдэл (0)
Сэтгэгдэл бичигдээгүй байна