Дэлхийн дулааралтай тэмцэх, байгаль орчноо хамгаалах тэмцлээр халхавч хийсэн янз бүрийн таагүй үзэгдэл олон гарах болж. Жишээлбэл, байгаль орчныг бохирдуулж, дулаарал үүсэхэд хүргэж байгаа нэг шалтгаан нь мал аж ахуй тул бүгдээрээ махнаас гарцгаая гэсэн яриа сүүлийн арваад жил дэлхий даяар олон сая дагагчтай болсон. Амьтны гаралтай бүх төрлийн бүтээгдэхүүн хүнсэндээ хэрэглэхээс татгалздаг хүмүүсийг веганууд гэдэг. Улмаар эрүүл хооллолт нэртэй хэдэн тэрбум долларын хөрөнгө эргэлдэж байдаг нүсэр том салбар бий болсон. Эд дэлхий даяар маш хүчтэй сурталчилгаа явуулдаг. Гэвч махыг хүн төрөлхтөн хүнсэндээ зүгээр ч нэг хэрэглээд байдаггүй, хүний бие дэх бодисын солилцооны талаарх мэдлэггүй хүмүүс веган хөдөлгөөний сурталчилгаанд хэт автан улайрахдаа өөртөө болон өрөөлд багагүй хохирол учруулах болсон юм. Жишээлэхэд, саяхан Австралийн Сидней хотын тойргийн шүүхээс нялх хүүхдээ веган хоолны дэглэм баримтлан хооллохдоо хэтрүүлж, тураалд оруулсан эцэг, эх хоёрт 300 цаг олон нийтийн ажил хийлгэх шийтгэл оноосон тухай "ABC" компани мэдээлжээ. Энэ оны гуравдугаар сард 33 настай эх, 35 настай эцэг нь хүүхдийнх нь бие муудлаа гэж эмнэлэгт очсоны дараагаар эмч нар хүүхэд хамгаалах албадад мэдэгдэн энэ хэрэг эхэлжээ. Веган эцэг, эх нь мах, махан гаралтай юм болгон муу гэдэг үзэлтэй тул охиноо төрснөөс нь хойш 19 сарын турш дан ургамлын гаралтай хоолоор хооллож. Тэд хүүхдэдээ оливын тостой овьёос, цагаан будааны шүүс, хүнсний ногоо, жимс, төмс, дупүнээс өөр зүйл өгдөггүй байж. Үр дүнд нь 1 ой 6 сартай хүүхэд нь ердөө 4,9 кг жинтэй байсан төдийгүй шинжилгээ хийх явцад хөөрхий охиныг ясны сийрэгжилттэй болсон гэсэн онош тавьсан байна. Хэвийн бойжилттой ийм хүүхэд насандаа хамгийн багадаа 10,2 кг жинтэй байх ёстой. Шүүгч Сара Хаггет шийдвэр гаргахдаа "Хүүхдүүддээ зориулан сонгосон, хийсэн хоол нь тэжээлийн бодисоор баялаг, хэвийн өсөлтөд шаардлагатай бүх л зүйлсийг хангалттай агуулсан байхад эцэг, эх болгон хариуцах ёстой" гэж мэдэгдсэн байна. Сурталчилгаанд хэт автан улайрсны гайгаар хүүхдэд ямар асуудал үүсээд байгааг сонсож, ойлгосон эцэг, эх хоёр шүүх дээр уйлж байсан гэнэ. Тэд тарьсан хэргээ ухамсарлаж, буруугаа бүрэн хүлээсэн байна.
Сэтгэгдэл (0)
Сэтгэгдэл бичигдээгүй байна