Өмнөд Солонгосыг маргаантай арлуудын орчим хээрийн сургууль хийсэнд Японы Засгийн газар дургүйцэн эсэргүүцэл илэрхийлсэн тухай "Киодо" агентлаг мэдээлсэн байна. Ням гарагт Өмнөд Солонгосын зэвсэгт хүчин Токто арлуудын орчим хоёр хоногийн хээрийн сургууль эхлүүлж байгаа талаар "Yonhap" агентлаг мэдээлээд байсан юм. Хээрийн сургуульд тэнгисийн болон агаарын цэргийн хүч, хуурай замын хүч оролцож байгаа аж. Япон нь Токто арлуудыг Такэшима гэж нэрлэдэг бөгөөд газар нутгийнхаа салшгүй хэсэг гэж үздэг тул ийнхүү эсэргүүцэл илэрхийлсэн байна. Токто (Такэшима) нэртэй бүлэг арлууд нь Япон тэнгист, Япон ба Өмнөд Солонгосын дунд байрладаг. Өмнө нь Японы мэдэлд байсан эдгээр арал Дэлхийн хоёрдугаар дайны дараа Өмнөд Солонгосын мэдэлд очсон. Үүнийг Япон улс "хууль бус булаан эзлэлт" гэж нэрлэсэн бөгөөд арлуудыг Симанэ мужид хамаарах засаг захиргааны нэгж, өөрийн газар нутаг гэж үзэх болсон. Улмаар арлуудыг харьяаллын тухай асуудлыг НҮБ-ын Олон улсын шүүхээр хэлэлцүүлэн шийдүүлэхийг санал болгодог. Гэвч Өмнөд Солонгос нь түүх, газар зүй болон хууль зүйн хувьд яалт ч үгүй өөрийнх нь нутаг тул түүнтэй холбоотой газар нутгийн маргаан ч байхгүй гэж мэдэгддэг. Эдгээр арлыг Өрнөдийнхөн Лианкурын арлууд гэж нэрлэдэг.
Сэтгэгдэл (0)
Сэтгэгдэл бичигдээгүй байна