​ОРОСЫН ВЛАДИВОСТОКТ УКРАЙНЫ ДАЛБААГ МАНДУУЛНА ГЭВ

Украйны дэд бүтцийн сайд Владимир Омелян нь тус улсын хилээс хэдэн мянган км-ийн алсад байршилтай Оросын Алс Дорнодын төв гэгддэг Владивосток хотыг өөрийн болгож далбаагаа мандуулна гэсэн утгатай мэдэгдлийг хийжээ.

Францын Ерөнхийлөгч Макрон хэд хоногийн өмнө Оросын Ерөнхийлөгч Путинтэй уулзах үеэр "Европ тив нь Лиссабоноос Владивосток хүртэл үргэлжилнэ" гэж хэлсний хариуд ингэж мэдэгдэж байгаа юм байна. Тухайн үед Макрон нь "Facebook" хуудсан дээрээ "Орос бол маш ихээр Европын улс юм. Бид Лиссабоноос Владивосток хүртэл үргэлжилсэн Европт итгэдэг" гэж бичиж байсан юм.

Тэгвэл Украйны сайд нь "Орос Украйны хооронд болж байгаа ээлжит тулаанд бид ялна гэдэгт дэндүү итгэлтэй байна. Лиссабоноос Владивосток хүртэл үргэлжилсэн Европыг тунхаглаж байгаа европ либералуудын зөв гэдэгт итгэлтэй байна. Үнэхээр Европ тийм болно. Гэхдээ Владивостокийн дээр Украйны далбаа намирсан цагт. Яг л зуун жилийн өмнөх шиг" гэжээ.

Үүний хариуд Оросын парламентын дээд танхимын гишүүд "Өөрийн Донбасс дээр далбаагаа мандуулж чадахгүй байж" гэдгээс эхлээд "Энэ мэт эрүүл бус мэдэгдэл ба байдлаараа баллаж хаясан улсаа сэргээхээ бод" хүртэл янз бүрийн хариу өгчээ. Улстөрч хүн хувийн байр сууриа илэрхийлсэн бол тоохгүй байж болох ч Украйны Засгийн газрын гишүүн, сайд хүн ийм мэдэгдэл хийж байгаа тул Оросын Гадаад харилцааны яамнаас ч тус мэдэгдэлд тайлбар өгчээ. Оросын ГХЯ-ны төлөөлөгч Мария Захарова "Омеляны дэвшүүлсэн санаа нь тэнэг гэхээс илүүтэй аймшигтай юм. 1918-1919 онуудад Владивосток хотыг Чехословак, АНУ, Японы цэргийн хэсгүүд түр хугацаанд булаан эзэрхэж байсан. Иймд "зуун жилийн өмнөх шиг" гэсэн үг нь тус бүс нутаг дахь булаан эзлэгч орнуудад хамааралтай юм" гэжээ.

Украйн нь 1917 оны хувьсгалын дараа Оросын эзэнт гүрний нутаг дэвсгэр дээр эхэлсэн иргэний дайны үеэр, 1918 оны нэгдүгээр сарын 22-нд түүхэндээ анх удаа тусгаар улс болсон ч 100 хоногийн дараа Кайзерын Германы цэрэг орж ирснээр түүнийг нь татан буулгасан байдаг. Үүний дараа Украйн нь 1991 онд Зөвлөлт задрахад ахин тусгаар улс болж, одоо хүртэл оршин тогтнож байгаа билээ. 100 хоногийн хооронд зэвсэгт хүчин гэхээр зүйл ч байгуулагдаж амжаагүй тул дайн тулаантай газар нутгаар тэр олон мянган км зам туулан Владивосток хүрч, эзлээд далбаагаа мандуулах ямар ч боломж, чадвар тэр үеийн Украйнд байгаагүй гэдгийг түүхчид онцолжээ.