Зимбабве улсын Засгийн газар цалинг нь америк доллараар өгөхгүй байгаад уурласан эмч нар бүх нийтийн ажил хаялт зарласан тухай "Reuters" агентлаг мэдээлжээ. Үүний өмнө тус улсын Засгийн газар нь эмч нарын цалинг зөвхөн үндэсний валютаар тавина, гэхдээ 60 хувиар нэмэгдүүлнэ гэсэн амлалт өгөөд байсан юм.
Гэвч Зимбабвегийн улсын мэдлийн эмнэлгийн эмч нарын холбоо нь энэ саналаас татгалзсан бөгөөд ажил хаялтыг есдүгээр сарын 3-аас эхлүүлэхээр болжээ.Цалингаа америк доллараар тавихыг шаардахад хүргэсэн хүчин зүйл нь зимбабве долларын инфляцийн түвшин юм. Зимбабве нь инфляцийн түвшин хамгийн өндөртэй дэлхийн улс. 2008 оны хэт инфляцийн үеэр үндэсний мөнгөн тэмдэгтийнх нь ханшны уналт 79,6 тэрбум хувь болж урьд хожид үзэгдээгүй дээд амжилт тогтоож байсан. Иймд энэ улс нь хэсэг хугацаанд үндэсний валютаа гаргахаа больж байсан удаатай. Түүнээс хойш төр солигдож, байдал арай дээрдсэн ч инфляц нь өндөр хэвээр байна. Он гарсаар Зимбабве долларын ханшны уналт сарын 42,9 хувь болоод байсан юм.
Сэтгэгдэл (0)
Сэтгэгдэл бичигдээгүй байна