Олон нийтийн сүлжээгээр тансаг амьдралаа харуулсан зураг байршуулж сагсуурдаг байсан Уайетт Пасек гэгч нь 17 жил хоригдох ялаар шийтгүүлсэн тухай "Mirror" сонин мэдээлжээ. Уайетт Пасек гэгч 22 настай залуу байнга бэлэн мөнгөн дундаж хэвтэж байгаа, эсвэл нүцгэн эмэгтэйчүүдийн хамт яваа эсвэл буу барьсан зураг байршуулдаг байж. Үүнтэй зэрэгцээд хөрөнгө оруулалтын суут стратеги боловсруулан амжилтад хүрч энэ их мөнгө, эд баялгийг цуглуулсан гэж сайрхдаг байжээ. Үүний дараагаар цагдаа нар түүний зургаан сарын турш мөрдлөг явуулаад тэр бүх мөнгийг хууль бусаар олдог байсныг тогтоожээ. Уайетт нь хоёр хамтрагчтайгаа нийлж Хятадаас оруулж ирсэн мансууруулах бодис бүхий эмийг, Америкт зөвшөөрөгдсөн өвчин намдаагч болгон савлаж зардаг байсан байна. Цагдаа нар Уайеттыг баривчлах үеэр хориотой эмийг савлах лаборатори ба бэлдэж тавьсан 100 мянган ширхэг эм илрүүлсэн байна. Зөвшөөрөлтэй эмийн хайрцагт савласан мансууруулах бодисыг тунг нь хэтрүүлэн хордож амиа алдах нь тун түгээмэл байдаг аж. Уайетт Пасекийг мансууруулах бодис хууль бусаар наймаалсан, зэвсэг хууль бусаар хадгалсан, хууль бусаар олсон мөнгө угаасан хэрэгт буруутай гэж үзэн 17 жил хорих ялаар шийтгэжээ.
Сэтгэгдэл (0)
Сэтгэгдэл бичигдээгүй байна