Польшийн Велюнь хотноо Дэлхийн хоёрдугаар дайн эхэлсэн өдрийг тохиолдуулсан дайнд үрэгдэгсдийн дурсгалыг хүндэтгэх арга хэмжээ өчигдөр болж өнгөрлөө. Тус арга хэмжээнд оролцсон Германы Ерөнхийлөгч Франк-Вальтер Штайнмайер үг хэлэхдээ Дэлхийн хоёрдугаар дайны үеэр үйлдсэн гэмт хэргийн төлөөх хариуцлагаа Герман улс мартахгүй гэсэн байна. Тэрээр герман ба польш хэлээр "Би Велюнь хот руу дайрахад амиа алдсан хүмүүст мэхийн ёсолж байна. Би Германы дарангуйллын золиос болсон польш хүмүүсийн өмнө өвдөг сөхрөн ёсолж байна. Би мөн уучлал хүсч байна. Энэ бол үзэн ядалт ба сүйрлийн давлагаа байсан. Энэ давлагаа нь энэ тивийг бүхэлд нь эзэрхэх хүсэлтэй хүний солиотой мөрөөдөл зай гаргаж өгөхийн тулд Польш улсыг, Европын соёлыг устгахыг санаархаж байсан юм" гэж хэлжээ.
1939 оны есдүгээр сарын 1-ний өглөөний 4 цаг 40 минутад Германы бөмбөгдөгч онгоцнууд Польшийн Велюнь хотыг бөмбөгдсөн нь хүн төрөлхтний түүхэн дэх хамгийн аймшигт үйл явдал болсон Дэлхийн хоёрдугаар дайны эхлэл болсон байдаг.
Дэлхийн хоёрдугаар дайн эхэлсэн өдрийн эмгэнэлийн арга хэмжээнд Польшийн Засгийн газар НАТО, Европын холбоо, "Дорнод түншлэл" хөтөлбөрт багтсан орны төрийн тэргүүнүүдийг урьсан. Арга хэмжээний хамгийн гол зочин болох ёстой Трамп нь АНУ руу хүчтэй далайн хар шуурга ирж байгаатай холбогдуулан ирэхээ больж, дэд Ерөнхийлөгч Пенсийг орондоо явуулсан байна. Харин ОХУ-ыг хөрш зэргэлдээ орныхоо эсрэг түрэмгийлэл үйлдсэн гээд Ерөнхийлөгч Путиныг урихаас татгалзсан нь нэлээд дуулиан тарьсан юм.
Сэтгэгдэл (0)
Сэтгэгдэл бичигдээгүй байна