Их Британийн Сангийн сайд Сажид Жавид нь "Brexit"-тэй холбоотой нэмэлт цогц арга хэмжээ авахад зориулж ахин 2 тэрбум фунт гаргахаар болсноо мэдэгджээ. Тэрээр Британийн парламентын доод танхимд үг хэлэхдээ энэ тухай мэдэгдсэн байна. Тэрээр "Сангийн сайдын албанд томилогдсон эхний өдрүүдэд "Brexit" болон тохиролцоо хийлгүйгээр гарахад бэлдэхэд нэмэлт 2,1 тэрбум фунт гаргасан. Харин өнөөдөр "Brexit"-ийг дараа жил хэрэгжүүлэхэд зориулан нэмэлт 2 тэрбум фунт гаргах тухайгаа мэдэгдэж байна. Энэ бол хилийн албанд нэмэлт албан хаагч авна, боомтуудын дэд бүтцийг сайжруулна гэсэн үг" гэжээ.
Их Британи нь Европын холбооноос гарах тухайгаа бичгээр мэдэгдсэнээс хойш 2 жилийн дараа буюу 2019 оны гуравдугаар сарын 29-нд тус холбоог орхин гарах ёстой байсан. Гэвч Британийн парламентын доод танхимын гишүүд нь Ерөнхий сайд Тереза Мэй ба Европын холбооны удирдлагын хооронд байгуулсан "Brexit"-ийн талаарх тохиролцооны нөхцөлүүдийг батлахаас татгалзсан юм. Иймд Европын холбоо нь буулт хийж "Brexit"-ийг эхлээд дөрөв эсвэл тавдугаар сар хүртэл хойшлуулна гэж байснаа аравдугаар сарын 31-н хүртэл хойшлуулж, харин Тереза Мэй нь мухардлаас гарах арга зам олоогүй тул албан тушаалаасаа огцорсон.
Сэтгэгдэл (0)
Сэтгэгдэл бичигдээгүй байна