"Google"-ийн мэдлийн "Alphabet Inc" компанийг шударга өрсөлдөөнийг хамгаалах хуулийг зөрчсөн байж болзошгүй гэсэн үндэслэлээр АНУ-ын мужуудын ерөнхий прокурорууд мөрдөн шалгах гэж байгаа тухай тус шалгалттай ойр байдаг эх сурвалж "Reuters" агентлагт мэдэгджээ. Техас мужийн прокуророор удирдуулсан 30 гаруй прокурор нь есдүгээр сарын 9-өөс эхлэн мөрдөн байцаах ажлаа эхэлнэ гэж эх сурвалж мэдэгдсэн. Харин "Google" нь энэ хэрэгтэй холбоотойгоор мужуудын эрх баригч нартай хамтран ажиллаж байгаа гэж мэдээлсэн байна. Мөрдлөг нь хувийн мэдээллийн халдашгүй байдал, өрсөлдөөнийг хамгаалахтай холбоотой асуудалд голлон анхаарна. АНУ-ын Хууль зүйн яамны шударга өрсөлдөөний хэлтсийн тэргүүн Макан Дельрахим нь Америкийн технологийн толгой компаниудын эсрэг өргөн цар хүрээтэй мөрдлөг явуулахаар мужуудын арав гаруй ерөнхий прокуроруудаа бүрдсэн бүлэгтэй хамтран ажиллаж байгаа тухай наймдугаар сарын эхээр мэдэгдэж байсан нь ийнхүү хэрэгжиж эхэлж байгаа бололтой.
Сэтгэгдэл (0)
Сэтгэгдэл бичигдээгүй байна