Монгол Улсын Үндсэн хуульд оруулах нэмэлт, өөрчлөлтийн төслийн хоёр дахь хэлэлцүүлгийг өчигдөр /2019.09.06/ орой УИХ-ын чуулганы нэгдсэн хуралдаанаар хийж дуусгасан даруйдаа УИХ дахь МАН-ын бүлэг хуралдаж, Үндсэн хуулийг ард нийтийн санал асуулгад шилжүүлэх шийдвэр гаргалаа.
Энэ талаараа өнөөдөр өглөө /2019.09.07/ УИХ-ын гишүүн, Төрийн байгуулалтын байнгын хорооны дарга С.Бямбацогт, УИХ-ын гишүүн, МАН-ын бүлгийн дарга Д.Тогтохсүрэн нар хэвлэлийн бага хурал хийж, мэдээлсэн юм.
Дараа нь Төрийн байгуулалтын байнгын хороо хуралдаанаараа Ард нийтийн санал асуулга явуулах УИХ-ын тогтоолын төсөл болон Үндсэн хуулийн нэмэлт, өөрчлөлтийг дагаж мөрдөхөд шилжих журмын тухай хуулийн төслийн анхны хэлэлцүүлэг гэсэн хоёр асуудлыг хэлэлцлээ. Байнгын хорооны хуралдаанаар Монгол Улсын Үндсэн хуульд оруулах нэмэлт, өөрчлөлтийн төслийн дагаж мөрдөх хугацааг 2020 оны 05 дугаар сарын 25-ны өдрийн 12.00 цаг буюу арван долдугаар жарны төмөр хулгана жилийн зуны тэргүүн сарын шинийн гуравны рашаан барилдлагатай өлзийт сайн шар луу өдрийн морин цагаас эхлэхээр хуралдаанд оролцсон гишүүдийн олонхи дэмжлээ. Процедурын хувьд одоо Байнгын хорооны хэлэлцсэн дээрх хоёр асуудлыг УИХ-ын чуулганы нэгдсэн хуралдаанаар хэлэлцэн батлах юм.
Н.Өнөрцэцэг
Сэтгэгдэл (0)
Сэтгэгдэл бичигдээгүй байна