Армени улсын Цовинар нэртэй жижиг тосгоны оршин суугчид дэргэдэх Амулсарын алтны орд газарт олборлолт явуулахыг эсэргүүцэн жагсаж байгаа тухай "Арменийн мэдээ" агентлаг мэдээлсэн байна.
Тосгоны оршин суугчид "Энэ бол бидний уулс, нутаг. Иймд бид уул шигээ хамгаалан босно. Алтны ордод олборлолт явуулахад аюулгүй гэж байгаа хүмүүс гэрийнхээ гадна уурхай ухуулна биз" гэж мэдэгджээ. Арменийн Ерөнхий сайд Никол Пашинян нь есдүгээр сарын 9-нд Амулсарын орд газарт олборлолт явуулахад хориг тавих үндэслэл байхгүй, олборлох ажил 2021 оны эхээр эхэлнэ гээд уурхай орох замуудыг хаахаа болихыг хүссэний хариуд ийм мэдэгдэл хийжээ.
Цовинар тосгоны хажууд байрладаг Амулсар уулын дор ихээхэн хэмжээний алт агуулсан орд газар байгааг 2006 онд илрүүлсэн байна. Мэргэжилтнүүдийн үзэж байгаагаар тус орд газарт 40-70 тонн цэвэр алт байгаа бөгөөд түүнийг гаргаж авахын тулд ойролцоогоор 31 сая тонн хүдэр хөдөлгөх шаардлагатай болох аж.
Геологийн эрэл хайгуулыг Британи-Америкийн хамтарсан "Lydian Armenia" компани 10 жилийн туш явуулсан бөгөөд 2016 оноос олборлолтын өмнө бэлтгэл ажил хийж эхэлсэн. Одоогоор тус компани нь алтны уурхайд 400 сая долларын хөрөнгө оруулалт хийгээд байгаа юм байна. Арменийн эрх баригчид Амулсарын алтны уурхайг тус улсын түүхэн дэх хамгийн том олон улсын хөрөнгө оруулалт гэж мэдэгдэн зүйл бүрээр дэмжиж байгаа.
Гэвч Амулсарын орд газар нь Арпа ба Воротан голуудын ай савд, бүс нутгийн хамгийн том цэнгэг уст нуур Севанаас холгүй байрладаг тул орон нутгийн иргэд олборлолтын явцад байгаль орчинд нөхөж баршгүй хохирол учирна гэж үзээд тууштай эсэргүүцсээр байгаа юм. Энэ ордоос алтыг ялгаж авахдаа цианидын уусмал ашиглах тул гол, нуурын усыг хордуулснаар унданд хэрэглэх, газар тариалангийн усалгаанд ашиглах боломжгүй болно гэж үзэж байгаа аж. Мөн АНУ-аас Арменид суугаа өмнөх Элчин сайдыг уурхайн олборлолтыг эхлүүлэх гэж Арменийн эрх баригчдад дарамт, шахалт үзүүлсэн гэж мэдэгдэж байжээ.
Сэтгэгдэл (0)
Сэтгэгдэл бичигдээгүй байна