Австралийн мэс засалчид эмчийн алдаанаас болж гарын эрхий хуруугаа алдсан эмэгтэйд хөлийнх нь эрхийг хурууг шилжүүлэн суулгах мэс заслыг амжилттай хийсэн талаар "The Washington Post" сонин мэдээлжээ. Австралийн Латроб хотод амьдардаг Бритни Томас гэдэг 17 настай охин 2018 оны дөрөвдүгээр сард Хонконгт крикетийн тэмцээнд оролцож байгаад зүүн гарынхаа эрхий хурууны ясыг бяцалсан байж. Латроб хотын эмч нар хуруунд нь хөнгөн мэс ажилбар хийж, хэсэг хугацаанд нөхөн сэргэх эмчилгээ хийсний дараа ахин крикет тоглох боломжтой гэж хэлсэн байна. Гэтэл хагалгаа хийлгэснээс зургаан хоногийн дараа Томасын хуруу хүчтэй өвдөж эхэлж. Эмч нар гипсэн боолтын авахад мэс засал хийсэн хуруу нь үхжээд харласан байжээ. Эмч нар хагалгааны дараа эрхий хурууны цусан хангамжийг түр хааж байсан татлага боолтоо авахаа мартсаны улмаас ийм байдал үүссэн болох нь илэрсэн. Ингээд хурууг тайран аваад оронд нь хөлийнх нь эрхий хурууг шилжүүлэн суулгах мэс засал хийсэн нь энэ аж. Харин шилжүүлсэн хөлийн эрхий хурууных нь оронд гуяных нь булчинг шилжүүлэн суулгаад, үлдсэн ясыг нь ургуулан шинэ эрхий хуруу бүрдүүлж өгсөн байна. Бритни Томас нь крикетийн мэргэжлийн тамирчин болохыг мөрөөддөг байсан ч хагалгааны дараа зүүн гар нь хэвийн ажиллах чадвараа алдсан. Мөн хагалгааны улмаас хичээлээс удаан хугацаанд завсардсан тул сургуулиасаа гарахаас өөр аргагүй болсон байна.
Сэтгэгдэл (0)
Сэтгэгдэл бичигдээгүй байна