Дэлхийн цаг агаарын өөрчлөлтийг зогсоохын төлөөх "Fridays For Future" /Ирээдүйн төлөөх баасан гараг/ залуучуудын хөдөлгөөнийхөн есдүгээр сарын 20-нд дэлхий даяар эсэргүүцлийн хөдөлгөөн өрнүүлэх хүрээнд ажил хаялт зарлахын уриалсан тухай Германы "DW" агентлаг мэдээлж байна. Тус хөдөлгөөний сайт дээр гаргасан мэдэгдлээс үзвэл энэхүү арга хэмжээнд дэлхийн 129 орны 200 гаруй хотын залуус оролцоно.
Тухайлбал, Герман улсад гэхэд энэ хөдөлгөөний хүрээнд 10 гаруй хотод 400 гаруй жагсаал цуглаан болно. Энэ хөдөлгөөний идэвхтнүүд Германы эрх баригчдад хандан 2030 он гэхэд нүүрсээр ажилладаг цахилгаан станцуудыг хаах, 2035 он гэхэд хүлэмжийн хийн ялгаруулалтыг тэг болгох, мөн зөвхөн нөхөн сэргээгддэг эх үүсвэрүүдээс эрчим хүч гарган авдаг болох зэрэг шаардлага хүргүүлж байсан юм.
Байгаль орчин, цагаан агаарын өөрчлөлтөд эрх баригчдын анхаарлыг татах зорилготой ийм ажил хаялт 2019 оны гуравдугаар сард анх болж байсан. Тэр үед Германы хотуудад амьдардаг 300 мянган хүн оролцож байв. Тавдугаар сард болсон дараагийн ажил хаялтад дэмжигчдийнх нь тоо нэмэгдэн 350 мянга болсон.
Энэ удаагийн ажил хаялтад оролцогчид нь 2015 байгуулсан Парисын тохиролцооны заалтуудыг биелүүлэхэд онцгой анхаарал хандуулах юм байна. Парисын гэрээнд оролцогчид орнууд хүлэмжийн хийн ялгаралтыг шат дараалан бууруулсаар XXI зууны төгсгөл гэхэд дэлхийн хэмжээнд агаарын температурыг 2 градусаар бууруулна гэж тохиролцсон.
"Ирээдүйн төлөө баасан гараг" хөдөлгөөнийг Шведийн сурагч, байгаль орчныг хамгаалах хөдөлгөөний идэвхтэн Грета Тунберг 2018 оны наймдугаар сард үүсгэн байгуулж байсан юм. Грета Тунберг нь есдүгээр сарын 21-нд АНУ-ын Нью-Йорк хотноо эхлэх НҮБ-ын Ерөнхий ассамблейн цаг агаарын өөрчлөлтийн талаарх чуулга уулзалтад оролцох үг хэлэх юм.
Сэтгэгдэл (0)
Сэтгэгдэл бичигдээгүй байна