Италийн Абруццо мужийн Христийн шашны католик урсгалын лам нар машины зогсоолын төлбөрийг маань, залбирал уншиж төлж байх саналыг гаргасан тухай "Avvenire" сонин мэдээлсэн байна. Авеццано нэртэй хотын Дарь эхийн сүмийн өмнөх зогсоолын төлбөрийг ингэж төлж байх санал гаргасан аж. Хийдийн ширээт лам Винченцо Де Мариогийн гаргасан санаачилгын дагуу мөргөлчид зогсоолын мөнгө төлөхийн оронд Дарь эхэд хандсан маань, залбирал уншдаг болно. Зогсоол дээрх хугацааны төлөөсийг ч гаргасан гэнэ. Тухайлбал, сүмийн өмнөх зогсоол дээр 15 минут машинаа тавихад нэг удаа Гэгээн Марияд хандсан нэг маань уншина, нэг цаг машинаа орхивол төлбөрт нь 10 маань унших бол 2 цагийн төлөөс 20 маань уншаад, бүр урт хугацаагаар машинаар орхихоор бол маань залбирлын зузаан номын бүхэлд нь унших хэрэгтэй болох аж. Хүмүүсийг шашин шүтлэгт эгүүлэн татахын тулд ийм арга сэдсэн юм байна. Ширээт лам гэхдээ энэ санаачилгыг хошин шинжтэй гээд тухайн хүн хэдэн удаа маань залбирал уншсаныг "Бурхан, Дарь эх хоёр л мэдэх хэрэг" гэж тайлбарлажээ. Санаачилгыг гаргаан Винченцо ламтан энэ хийдийг 10 гаруй жил тэргүүлж буй бөгөөд энэ хугацаанд мөргөхөөр ирэх хүний тоо эрс багассан юм байна. Тэрээр хүмүүс сүм хийдээр орж Бурхантай ярих цаг завгүй болж байгаад харамсаад, өөрт нь бол машинаа зогсоол дээр тавьсан жолооч ганц удаа залбирахад л хангалттай гээд "Хамгийн гол нь хүн түр ч болтугай амсхийж Бурханд хандах нь чухал" гэжээ.
Сэтгэгдэл (0)
Сэтгэгдэл бичигдээгүй байна