Казахстанд Хятадын 55 үйлдвэр байгуулах гэж байгааг эсэргүүцсэн зөвшөөрөлгүй жагсаал цуглаанд оролцсон 57 хүнийг баривчилсан тухай тус улсын Дотоод хэргийн яам мэдээлсэн байна. Казахстанд үйл ажиллагаа явуулахыг нь хориглосон "Демвыбор Казахстана" /Казахстаны ардчилсан сонголт/ хөдөлгөөн есдүгээр сарын 21-нд Хятадын үйлдвэр барихыг эсэргүүцсэн бүх нийтийн жагсаал цуглаанд гарахыг уриалсан мэдэгдэл гаргасан. Хариуд нь Казахстаны прокурорын албанаас хууль бус байгууллагын өдөөн хатгалгад автан зөвшөөрөлгүй арга хэмжээнд оролцохгүй байхыг удаа дараалан сануулсан ч түүнийг нь үл хэрэгссэн хүмүүсийг ийнхүү саатуулсан байна. Казахстанд энэ удаагийн Хятадын эсрэг жагсаал цуглаанд есдүгээр сарын 4-нд эхэлсэн. Тухайн үед Хятадын хуучирсан, байгаль орчинд аюултай 55 үйлдвэрийг Казахстанд барих гэж байгаа тухай мэдээ интернэтээр цацагдахад хүмүүс анхлан Жанаозен хотын гудамжинд гарсан бол удалгүй Алмата, Актау, Актобе, Караганд, Шымкент, Нур-Султан хотуудын гудамжинд цөөн хүн оролцсон жагсаал болсон. Жагсагчид мөн Ерөнхийлөгч Касым-Жомарт Токаевыг БНХАУ-д албан ёсны айлчлал хийж байгааг давхар эсэргүүцэж байсан. Казахстаны Ерөнхийлөгч нь иргэддээ хандан хүмүүсийн эх оронч үзлээр далимдуулан улс төрийн ашиг хонжоо хайсан хүмүүсийн хоосон ярианд хууртахгүй байхыг уриалж байсан.
Сэтгэгдэл (0)
Сэтгэгдэл бичигдээгүй байна