АНУ-ын Ардчилсан намаас Ерөнхийлөгч Трампын эсрэг импичмент зарлаж, албан тушаалаас нь хугацаанаас нь өмнө огцруулах асуудлыг санал хураалт явуулахаар болоод байгаа. АНУ-ын Конгрессын доод танхимд Ардчилсан нам нь олонх байдаг тул ийм шийдвэр гаргасан гэж үзэж байна.
Гэхдээ импичментийг Конгрессын дээд танхим давхар баталгаажуулах шаардлагатай атал тэнд нь Трампыг нэр дэвшүүлсэн Бүгд найрамдах нам олонх тул эцсийн бүлэгт импичмент үр дүнд хүрнэ гэсэн магадлал тун бага гэдгийг шинжээчид онцолж байна.
Ардчилсан нам нь Трампыг Украйны Ерөнхийлөгч Зеленскийтэй утсаар ярилцахдаа сонгуулийн гол өрсөлдөгч Жо Байден болон түүний хүүгийн талаар мөрдлөг явуулахыг шаардсан, ингэснээр харь улсыг сонгууль хөндлөнгөөс оролцож нөлөөлөх боломж бий болгон АНУ-ын тусгаар тогтнолд аюул учруулсан гэж буруутгаж байгаа юм. Харин Трамп нь энэ бүхнийг үгүйсгэсэн төдийгүй Зеленскийтэй хийсэн ярианыхаа бичлэгийг буулган олон нийтэд албан ёсоор ил болгосон. Ингээд зогсохгүй Зеленскийтэй хийсэн анхны яриагаа, дэд Ерөнхийлөгч Пенсийн Зеленскийтэй хийсэн ярилцлагуудыг бүгдийг нь олон нийтэд ил болгох хэрэгтэй гэж мэдэгдсэн байна.
Импичмент ямар ч үр дүнтэй болсон бай АНУ-ын Ерөнхийлөгчийн сонгуультай холбоотой энэ бүх дуулиан шуугианаас хамгийн их хэлмэгдэж, хохирч магадгүй нь Украйны Ерөнхийлөгч Зеленский болж таараад байгааг судлаачид мөн онцолсон. Трамптай хийсэн ярианы үеэр Европын холбооны талаарх тийм ч таатай бус зүйлсийг ярьж байсныг нь ил болгосон нь тийм ч таатай бус. Нэг талаас Америкийн Ардчилсан намаас түүнээр Трампын эсрэг мэдүүлэг хийлгэх гэж дарамтлахдаа 2020 оны сонгуулийн дараа Украйнд үзүүлэх зээл тусламжаар далайлгана. Нөгөө талаас Трамп, Бүгд найрамдах нам нь мөн л зээл тусламжаар барьцаа хийн өөрийн талд мэдэгдэл гаргуулахыг хичээх нь Зеленскийн олон улсын нэр хүндэд яав ч сайнаар ч нөлөөлөхгүй гэж үзэж байгаа юм байна.
Сэтгэгдэл (0)
Сэтгэгдэл бичигдээгүй байна