ХАЙХРАМЖГҮЙГЭЭС ӨӨР ЭМЭГТЭЙД АБОРТ ХИЙСЭН БАЙЖЭЭ

Өмнөд Солонгосын нэгэн эмнэлэгт хайхрамжгүйгээс болж өөр эмчлүүлэгчид аборт хийсэн явдал гарсан тухай "The Korean Herald" сонин мэдээлжээ. Наймдугаар сарын эхээр Вьетнам улсаас эмчилгээ хийлгэхээр ирсэн хөл хүнд эмэгтэй Сөүл хотын нэгэн эмнэлэгт хүргэгджээ. Хүлээн авсан эмч нь эмэгтэйд тариа хийх заал өгөөд ажилбарын өрөө руу явуултал тэнд байсан эмч, сувилагч хоёр эмэгтэйг үр хөндүүлэхээр ирсэн гэж үзээд онош, эмчийн заалт зэргийг тодруулалгүйгээр өвчин намдаагч тариад, үр хөндөх ажилбар хийчхэж. Харин үр хөндүүлсэн эмэгтэй өвчин намдаагч тарианы улмаас өөрт нь ямар ажилбар хийснийг мэдээгүй бөгөөд маргааш нь цус алдсан зовуурьтайгаар эмнэлэгт буцаж ирэхдээ үр хөндүүлснээ мэдээд цагдаагийн байгууллагад хандсан байна. Цагдаа тус хэргийг шалгаад үр хөндөх ажилбар хийсэн эмч, сувилагч хоёрт анхаарал болгоомжгүй хандсан зүйл ангиар хэрэг үүсгэсэн тухайгаа есдүгээр сарын 23-нд мэдэгджээ. Өмнөд Солонгост үр хөндөлтийг зөвхөн эрүүл мэндийн тусгай заалт эсвэл эрүүгийн гэмт хэрэгтэй холбоотой тохиолдолд л хийхийг зөвшөөрдөг. Гэхдээ 2019 оны дөрөвдүгээр сар үр хөндөлт хийлгэхийг хуулиар зөвшөөрсөн ч тус хууль нь 2020 оны арванхоёрдугаар сарын 31-ээс үйлчилж эхлэх аж.