Завхан аймгийн Дөрвөлжин сумын Онц багийн Багануур гэдэг газарт нүүдлийн шувууд ихээр шалтгаангүйгээр өвчилж үхсэн талаар өмнө нь мэдээлсэн билээ.
Шувуу ямар шалтгаанаар үхэж, хорогдож байгаа талаар Завхан аймгийн Дөрвөлжин сумын Засаг дарга Ч.Батдөлөөс тодруулахад "Онцгой байдал, цагдаа, Зооноз өвчин судлалын төв, Мал эмнэлэг үржлийн газар, Эрүүл мэндийн газар, Байгаль орчин, аялал жуулчлалын газар, Ус, цаг уур орчны шинжилгээний газар, нутгийн захиргааны байгууллагууд газар дээр нь хамтран ажилласан. Одоо хорогдол багассан. Юунаас болж шувууд хоргодсон талаарх тодорхой мэдээлэл ирээгүй байна.
Мал эмнэлгийн газар, Зооноз өвчин судлалын төв, Зэрлэг ан амьтан хамгаалах төвөөс дахин шинжилгээ хийгээд авсан. Одоогийн байдлаар 2600 орчим шувуу хорогдсон байгаа. Ихэвчлэн алаг ангир үхсэн. Шувууны сэг зэмийг нь устгах, халдваргүйжүүлэх ажлыг манай сумын Мал эмнэлэг, Байгаль орчны газрын хүмүүс хийж байгаа" гэв.
Багануур орчимд нүүдлийн шувууд шалтгаангүйгээр үхэж байгаатай холбогдуулан МХЕГ, аймгийн Мэргэжлийн хяналтын газар хамтран газар дээр нь хяналт шалгалт хийж, нуурын ус, нуур орчмын хөрснөөс дээж авч шинжлүүлжээ.
Нуурын уснаас авсан дээжинд хүнд металын шинжилгээгээр натри, хүнцэл зэрэг хүнд металын бохирдол ихтэй, нян судлалын шинжилгээгээр эмгэг төрөгч Salmonella spp илрээгүй байна.
Харин гэдэсний бүлгийн болзолт эмгэг төрөгч нян Citro bacter spp илэрсэн бөгөөд нуурын ус мал, амьтны ялгадсаар бохирдсонтой холбоотой аж. Хөрсний дээжинд хийсэн хүнд металын шинжилгээгээр ванадий зөвшөөрөгдөх дээд хэмжээнээс их гарсан хэдий ч хортой, аюултай агууламжийн хэмжээнээс бага байна. Нуурын ус болон хөрсний дээжинд цианит илрээгүй аж.
Гэвч нутгийн иргэдийн хэлж, хардаж буйгаар "Баян-Айраг" компанийн буруутай үйл ажиллагаанаас болсон. Тус компани удаа дараа цианит алдаж асгасан тул хүн болон мал, шувууд хордож өвчилж байна гэж мэдээлсэн юм.
Сэтгэгдэл (0)
Сэтгэгдэл бичигдээгүй байна