​ЗЭВСЭГТ ХҮЧНИЙ ЖАНЖИН ШТАБЫН ШИНЭ ДАРГАД БРИГАДЫН ГЕНЕРАЛ Д.ГАНЗОРИГИЙГ НЭР ДЭВШҮҮЛЛЭЭ

Зэвсэгт хүчний жанжин штабын даргаар ажиллаж байсан генерал А.Ганбат хэд хоногийн өмнө өөрийн хүсэлтээр ажлаасаа чөлөөлөгдсөн талаар бид мэдээлсэн. Тэрбээр эрүүл мэндийн хувьд цаашид үүргээ гүйцэтгэх боломжгүй боллоо гэсэн шалтгаанаар ажлаасаа чөлөөлөгдөх хүсэлтээ өгсөн байна. Тэгвэл өнөөдөр УИХ-ын Аюулгүй байдал, гадаад бодлогын байнгын хорооны хуралдаанд Монгол Улсын Ерөнхийлөгч Х.Баттулга Зэвсэгт хүчний жанжин штабын даргад томилуулахаар бригадын генерал Д.Ганзоригийн нэрийг оруулж ирлээ. Бригадын генерал Д.Ганзориг нь ОХУ-д цэргийн дээд сургууль төгссөн. АНУ-д явган цэргийн офицерийн хоёр шатны дамжаа дүүргэсний зэрэгцээ Зэвсэгт хүчний 150, 311 дүгээр ангид Энхийг сахиулах ажиллагааны удирдагч, Зэвсэгт хүчний жанжин штабт мэргэжилтэн, ҮАБЗ-д мэргэжилтэн, Зэвсэгт Жанжин штабын орлогч, Ажиллагааны удирдлагын газрын дарга зэрэг албан тушаал эрхэлж, Зэвсэгт хүчний салбарт тасралтгүй 29 жил алба хаасан байна. Түүний төрийн тусгай албанд мэргэшсэн байдал, ажлын туршлагыг харгалзан томилох асуудлыг хэлэлцээд, байнгын хорооны хуралдаанд оролцсон гишүүдийн олонхи дэмжлээ. Хуралдааны үеэр гишүүд, өмнөх дарга А.Ганбат хэдхэн сар ажилласан. Зэвсэгт хүчний жанжин штабын дарга хэдхэн сар ажиллаж үзээд, дамжин өнгөрдөг албан үүрэг биш. Болохгүй бол эрүүл мэндийн шалтгаанаар гээд ажлаа өгчихдөг байж таарахгүй. Маш чухал энэ албыг удирдахаар шийдсэн бол тогтвор суурьшилтай ажиллах хэрэгтэй хэмээн санал хэллээ. Мөн хуулиараа цэргийн албан хаагч улстөрийн зорилготой үйл ажиллагаанд нэгдэж болохгүй учир улс төрөөс ангид, мэргэжлийн үйл ажиллагаа явуулахыг захиж байлаа.

Н.ӨНӨРЦЭЦЭГ