​ЭРДОГАН НЬ ТУРКИЙГ СИРИЙН НУТАГТ КУРДУУДЫН ЭСРЭГ БАЙЛДААНЫ АЖИЛЛАГАА ЯВУУЛАХ ЭРХТЭЙ ГЭВ

Турк нь өчигдөр Сирийн зүүн хойд нутаг дахь курдын салан тусгаарлагчдын эсрэг байлдааны ажиллагаа албан ёсоор эхлүүлээд ихээхэн шүүмжлэлд өртөөд байна. Тухайлбал, АНУ-ын Ерөнхийлөгч Трамп нь хариу болгож хориг арга хэмжээ аваад зогсохгүй Туркийн эдийн засгийг бүхэлд нь сүйрүүлнэ гэж амлалаа. Үүнээс гадна Ирак ба Египетийн Ерөнхийлөгч нар Туркийн эсрэг хамтарсан бодлого хэрэгжүүлэх тухай утсаар ярьж тохиролцсон байна. Харин Туркийн Ерөнхийлөг Эрдоган үүний хариуд өөрийн улсыг "Энх тайвны эх үүсвэр" нэртэй байлдааны ажиллагааг Сирийн нутаг дээр явуулах хууль зүйн эрхтэй гэж мэдэгдэв. "Yeni Safak" сонинд ярилцлага өгөхдөө 1998 онд Аданд Сирийн Засгийн газартай байгуулсан гэрээний курдын салан тусгаарлагчдын эсрэг байлдааны ажиллагаа явуулах эрхтэй болсон гээд "Энэ гэрээ ёсоор Сирийн эрх баригчид нь Курдистаны ажилчны намын эсрэг арга хэмжээ авахгүй байгаа тохиолдолд манай цэргийнхэн алан хядагчдыг мөрдөн хөөх эрхтэй болсон" гэжээ. Мөн Сирийн агаарын орон зай нь АНУ-ын өмч биш болохоор Туркийн байлдааны нисэх онго ашиглах бүрэн эрхтэй гэжээ. Ийнхүү Турк нь ээлжит удаагаа АНУ-тай санал зөрөлдөж, бүс нутагт бие даасан бодлого явуулах чадвартай томоохон тоглогч гэдгээ харууллаа. Гэхдээ Эрдоган нь арваннэгдүгээр сарын 13-нд Вашингтон хотноо Трамптай уулзаж ярилцах боломж гарна гэдэгт найдаж байгаагаа мэдэгдсэн байна. Эрдоган нь Сирийн курдуудын эсрэг байлдааны ажиллагаа явуулах гэж байгаа талаар ОХУ-д мэдэгдэн, Путинтэй устаар ярьсан. Гэхдээ хамгийн гол нь Сирийн газар нутаг дээр байлдааны ажиллагаа явуулах гэж байгаа талаар Сирийн албан ёсны Засгийн газраас зөвшөөрөл огт аваагүй, асуугаа ч үгүй. Эрдоганыг шүүмжилсэн АНУ-аас эхлээд Европын холбоо, Их Британи, Ирак, Египет хүртэл бүх улс орны төрийн тэргүүнүүд Эрдоганыг тусгаар улсын газар нутаг дээр тодорхой нэг үндэстний эсрэг байлдааны ажиллагаа явуулан түрэмгийлэл үйлдэж буйг бус харин тэдэнтэй зөвшилцөлгүй, тэдний ашиг сонирхлыг авч үзсэнгүй гэж л шүүмжилж байгаа юм.