Туркийн зэвсэгт хүчин Сирийн хойд нутагт байлдааны ажиллагаа явуулах болсон шалтгааныг Америк амлалтаа биелүүлээгүйгээс болсон гэсэн тайлбарыг Туркийн Гадаад хэргийн сайд Мевлют Чавушоглу өгчээ.

Тэрээр Азербайжаны нийслэл Бакуд болж байгаа "Глобал медиагийн хөгжлийн чиг хандлага: Эрсдэл ба боломж" нэртэй олон улсын хуралд оролцох үеэрээ "Туркийн эсрэг хориг арга хэмжээ аваад үр дүнд хүрэх боломжгүй. Туркт өгсөн амлалтаа биелүүлж байх хэрэгтэй. АНУ-ын зүгээс өгсөн амлалтаа биелүүлээгүй тул бид Сирид ажиллагаа явуулж эхэлсэн" гэжээ. Америкийн амлалт гэж Сири, Иракийн нутаг дамнан нуугдаж байгаа курд салан тусгаарлагчдыг дэмжихгүй гэсэн амлалтыг хэлж байгаа бололтой.

Мөн Европын холбооны гишүүн орнууд Сирид явуулж байгаа ажиллагааг шүүмжилсэн хамтарсан мэдэгдэл гаргасны дараа Туркийн гадаад хэргийн яам тэднийг алан хядагчдыг өмөөрлөө гэж шүүмжилсэн байна. Туркийн Гадаад хэргийн яам "Европын холбоо нь алан хядагч элементүүдийг хамгаалах хандлага харуулах нь байж боломгүй зүйл" гэжээ. Европын холбооны гишүүн орнууд Туркийн явуулж байгаа ажиллагааг зүгээр нэг шүүмжилсэнгүй, Турк руу хийж байгааг зэвсгийн экспортыг түр зогсоохоор шийдсэн байна. Үүний өмнөхөн Туркийн Ерөнхийлөгч Эрдоган нь Европын холбоо курд салан тусгаарлагчдын эсрэг ажиллагаанд саад хийхийг завдал Сирийн дайнаас дүрвэн улсад нь түр суурьшаад байгаа олон сая дүрвэгчдийг Европ руу явуулна гэж анхааруулж байсан юм.

Сирийн Засгийн газрын арми өмнө нь курдуудын хяналтад байсан чухал хотуудад цэргээ оруулж байх зуур курдууд ба Туркийн талыг баримтлагч бүлэглэлүүд, туркийн цэргүүдийн хооронд ширүүн тулаан болж байна. НҮБ-ын Ерөнхий нарийн бичгийн даргын албан ёсны төлөөлөгчийн мэдээлж байгаагаар энэхүү ажиллагаанаас дайжин, гэр орноо орхин явж байгаа байгаа хүний тоо 160 мянгад хүрээд байгаа аж.