Намрын дунд сарын шинийн 15-ны билэгт сайн өдөр буюу 10 сарын 15-нд аймгийн Цагдаагийн газрын шинэ байрны нээлт боллоо. Энэхүү барилга нь 2 тэрбум 40 сая төгрөгийн төсөвт өртэйгтэй, зоорийн давхартайгаа 4 давхар, тоноглосон 5 өрөөтэй, 100 хүний багтаамжтай хурлын заал, 6 машины граштай, оффиссын зориулалттай 37 өрөө бүхий цагдаагийн байгууллагын төрөл, албадын үйл ажиллагааг бүхэлд нь багтаажээ. Барилгын ажлыг 2018 онд эхлүүлж байсан бол өнөөдөр ийнхүү төлөвлөсөн хугацаандаа ашиглалтад оруулж байна. Энэ үеэр аймгийн Засаг дарга Н.Ганбямба хэлсэн үгэндээ "Бид өмнө нь Татварын хэлтэс, Стандарт хэмжилзүйн хэлтэс, Авто тээврийн төв, ШШГГ, Тагнуулын хэлтэс, Нэгдсэн эмнэлэг, Газрын харилцаа, Бэрх тосгоны аврах гал унтраах барилга зэрэг төрийн 8 байгууллагаа шинэ байртай болгосон бол өнөөдөр 9 дэх байрныхаа нээлтийг хийж байна. Тун удахгүй ХХҮГ-ын байр ашиглалтад орно. Төрийн байгууллагуудыг шинэ байртай болгосноор тэнд ажиллаж байгаа ажилтан албан хаагчдын ажлын орчин нөхцөл сайжрахын зэрэгцээ түүгээр үйлчлүүлж байгаа иргэдийн хувьд үйлчилгээндээ сэтгэл ханамжтай байлгахыг зорьж байна" гэв. Мөн шинэ байрыг нь мялааж 43 инчийн ухаалаг дэлгэц гардууллаа. Хэнтий аймаг дах Цагдаагийн газрын Нийтийн хэв журам хамгаалах тасаг, Замын цагдаагийн тасаг нь 2018 онд улсын тэргүүний тасаг болж ажил үйлсээрээ бусдыгаа хошуучлан ажиллажээ.
Сэтгэгдэл (0)
Сэтгэгдэл бичигдээгүй байна