Туркийн цэргийн ажиллагааны улмаас Сирийн курдууд Асадын армид стратегийн чухал ач холбогдолтой түшиц газруудаа хүлээлгэн өгснөөр Сирийн албан ёсны Засгийн газар нь газар нутгаа бараг бүхлээр нь мэдэлдээ эгүүлэн авч байгаа юм. Ийм нөхцөлд орох орох, орогнох газаргүй болсон "Лалын улс"-ын алан хядагчид найдвартай газар орон хайж эхэлсэн.
ОХУ-ын Гадаад хэргийн сайд Сергей Лавров Сочи хотноо Холбооны аюулгүй байдлын албатай түнш орнуудын аюулгүй байдал ба хууль сахиулах байгууллагуудын удирдлагуудтай уулзахдаа дээрх асуудалтай холбоотой мэдэгдэл хийжээ. Тэрээр "Ливийн талууд урт хугацааны турш эрс ширүүн сөргөлдөж байгаагийн улмаас энэ улсад аюулгүй байдлын вакумыг хадгалагдсан хэвээр байж, алан хядах бүлэглэлүүдэд толгой өндийлгөх нөхцөл бүрдүүлж байгаа тул Ирак ба Сирийн алан хядагчид тийш төвлөрч эхлээд байна" гэжээ.
Ливийг 1969 оноос хойш удирдаж байсан Муаммар Каддафийг алагдсаны дараа 2011 онд эхэлсэн иргэний дайн одоо ч үргэлжилсэн хэвээр байна. Ливийн зүүн нутагт парламентын талыг баримтлагчид төвлөрч байгаа бол нийслэл Триполид Үндэсний эв нэгдлийн засгийн газрын талыг баримтлагч төвлөрөн олон жилийн турш байлдаж байна. Ливид энэ хоёр үндсэн бүлэглэлээс гадна тухайн үеийн нөхцөл байдал өөрчлөгдөхийг даган давамгайлсан талд нь түр орж байлддаг тус бүр өөрийн жижиг хот, сууриныг хянадаг олон арван жижиг бүлэглэлүүд байдаг. Эдний аль аль нь Сири, Иракаас зугтаасан байлдах чадвар сайтай туршлагатай зэвсэгт бүлэглэлүүдийг өөрийн талд татахыг цааргалахгүй.
Сэтгэгдэл (0)
Сэтгэгдэл бичигдээгүй байна