Морьтон Монголынхоо малчин ахуй, биет бус соёлын өвийг хадгалах, адуу дагасан соёлыг сурталчлах Талын Түмэн Адуу эвент Түүхэн аялал жуулчлалын бүс нутаг гэж тодорхойлогдсон Хэнтий аймагт 11-р сарын 1-3нд зохион байгуулагдах гэж байна. БОАЖЯам, Хэнтий аймгийн ЗДТГ, Батноров сум болон бусад хувийн хэвшлийн компаниудын дэмжлэгтэйгээр Мөнх Харилцаа ТББ-аас санаачлан хэрэгжүүлж буй энэ удаагийн Талын Түмэн Адуу эвентэд Улс, аймгийн аварга адуучид болон адуу сонирхогч залуус 2,000 адуун сүрэгтэйгээ оролцоно. Энэ жилийн хувьд Монгол улсын аймаг бүрийг шилдэг гэж тооцогдох 20 гаруй адуучдын дунд Шургуу 2019 тэмцээн нь 10 орчим сая төгрөгийн шагналын сантайгаар нээлттэй зарлагдаж Шилдэг уургачаа шалгаруулах ба Хэнтий аймгийн хурдны удмын санг тээгч, угшил сайт монгол гүүг шалгаруулах "Хэнтий аймгийн Шилмэл Гүү" уралдааныг аймгийн хэмжээнд морь сонирхогч нартаа зориулан зохион байгуулахаар анх удаа хөтөлбөртөө шинээр тусгаснаар энэ жилийн онцлогууд тодорч байна. Мөн Өвөр Монголын Өөртөө Засах Орноос 50 гаруй адуучид арга хэмжээнд хуваагдан оролцох нь бас нэгэн онцлог болж байна. Арга хэмжээ нь Хэнтий аймагтаа хамгийн олон адуутай Батноров болон зэргэлдээх сумдын малчдын амьжиргаа, эдийн засгийн эргэлтийг дэмжих үүднээс 2015 оноос эхлэн жил бүр зохиогдож байна.
Сэтгэгдэл (0)
Сэтгэгдэл бичигдээгүй байна