Испаний Каталони өөртөө засах мужийг салан тусгаарлах бүх нийтийн санал асуулга явуулсан хүмүүст Испанийн шүүхээс аравдугаар сарын 14-нд олон жил хорих ял оноосны эсэргүүцсэн жагсаал цуглаан нь үймээн, эмх замбараагүй байдал болон хувирсан байна. Шүүхийн шийдвэрийг эсэргүүцэгчид аравдугаар сарын 18-нд Каталони муж даяар бүх нийтийн ажил хаялт зарлаж, 500 мянган хүн оролцсон сүрт жагсаал явуулсан. Жагсаал тайван замаар явагдана гэж мэдэгдэж байсан ч радикал үзэлт "Ардчиллын цунами" нэртэй бүлэглэлийнхэн цагдаа нарын эсрэг хүч хэрэглэснээр тайван жагсаал нь үймээн, дээрэм тонуул, түймэр болж хувирчээ. Үүний улмаас зөвхөн Барселон хотод гэхэд л 152 хүн шархадсанаас 50 хүнийг эмнэлэгт хэвтүүлэх шаардлагатай болсон байна. Материаллаг хохирлын тухайд гэвэл ганцхан хоногийн дотор 300 гаруй контейнерыг шатааж, олон арван зоогийн газар, цайны газар, жижиг дэлгүүрүүд дээрэм тонуулд өртжээ. Энэ бүхнээс үүдсэн хохирлыг эхний байдлаар 2 сая евро гэж багцаалдаад байгаа юм байна.
Сэтгэгдэл (0)
Сэтгэгдэл бичигдээгүй байна