Эквадор нь 11 хоног үргэлжилсэн олныг хамарсан жагсаал, түүнийг дагалдсан эмх замбараагүй байдал, үймээний дараа эргэн хэвийн амьдралдаа орж байна. Эквадорын Засгийн газар дизель түлшний үнийг чөлөөлж, нийтийн тээврийн хэрэгслээр зорчих төлбөрийг нэмсний дараа улс даяар эсэргүүцлийн жагсаал, үймээн дэгдсэн. Энэхүү үймээний явцад 8 хүн амиа алдаж, 1500 гаруй хүн шархадсан байна. Эвдрэл сүйтгэлийн улмаас учирсан хохирлын хэмжээг 1,6 сая доллар гэж тогтоогоод байгаа. Үймээний улмаар гудамж талбайн дагуу байрласан жижиг дэлгүүр, цайны газрууд хамгийн ихээр хохирчээ. Мөн эсэргүүцлийн үеэр тус улсын газрын тос олборлох үйлдвэрүүд зогссон нь багагүй хохирол дагуулж. Байдал хяналтаас гарч магадгүй болсонд эрх баригчид өмнөх шийдвэрээ цуцалснаар эсэргүүцлийн жагсаал намжсан байна. Шатахууны үнэ буцаад эсэргүүцлийн жагсаалын өмнөх хэмжээнд очсон тул иргэд машиныхаа шатахууны савыг дүүргэх гэж яарч байгаа тухай мэдээ ирж байна. Эквадорын хүн амын 60 хувь нь ядуу амьдралтай тул шатахууны үнийг чөлөөлөх нь хамгийн түрүүнд тэдэнд хүнд тусна гэж үзсэн тул ийнхүү олныг хамарсан үймээн дэгдсэн байна
Сэтгэгдэл (0)
Сэтгэгдэл бичигдээгүй байна