2020/11/28
USD 2,811

​БАНГЛАДЕШТ ОЮУТАН ЭМЭГТЭЙН ҮХЭЛД БУРУУТАЙ 16 ХҮНД ЦААЗААР АВАХ ЯЛ ОНООЖЭЭ

О.Шүрэнцэцэг
2019/10/25

Суралцдаг лалын шашны сургуулийнх нь захирал бэлгийн дарамт үзүүлж байгаа тухай цагдаа гомдол гаргасан 19 настай охины үхэлд буруутай 16 хүнд Бангладешийн шүүхээс цаазаар авах ял оноосон тухай "ВВС" мэдээлж байна.

Бангладешт ийм төрлийн хэргийн шүүх ажиллагаа хэдэн жилээр үргэлжилдэг ч энэ хэрэг олны уур бухимдлыг хүргэсэн тул хурдавчилсан байдлаар явагдсан гэдгийг "ВВС" онцолжээ. 19 настай Нусрат Жахан Рафи-ийн үхэлд сургуулийнх нь багш нар, хамт суралцдаг охид болон эрх баригчид "Авами Лиг" намын орон нутгийн салбарын хоёр удирагч буруутай болохыг шүүх хурлаас тогтоосон. Мөн оюутан охины мэдүүлгийн дагуу баривчлагдаад байсан сургуулийн захирлыг шоронгоос охиныг алах тушаал өгсөн болохыг тогтоосон байна.

Нусрат охин нь энэ оны гуравдугаар сард сургуулийнх нь захирал өрөөндөө дуудан ёс бус байдлаар оролдсон тухай цагдаад гомдол гаргасан байж. Гомдлын дагуу цагдаа нар захирлыг баривчилсны дараагаар оюутан охиныг гомдлоо буцааж авахыг шаардсан сүрдүүлэг, дарамт шахалт ирэх болсон байна. Дөрөвдүгээр сарын 6-нд охиныг шалгалт өгөхөөр сургуульд ирэхэд хамт суралцдаг охид нь сургуулийн дээвэр дээр худал хэлэн дагуулж гарсан. Тэнд нүүр биеэ битүү халхалсан өмсгөл бүхий хүмүүс охиныг бүслэн цагдаад гаргасан гомдлоо буцааж авахыг шаардаж. Нусрат татгалзахад керосин асгаж байгаад шатаажээ. Оюутан охин золоор зугтан гэртээ ирж чадсан ч биеийнх нь гадаргын 80 хувь нь түлэгдсэнээс болоод дөрөв хоногийн дараа нас барсан байна. Гэхдээ тэрээр нас барахаас өмнө ахдаа хандан видео бичлэг хийлгэж, захирал нь бэлгийн дарамт учруулсан тухай болон сургуулийн дээвэр дээр өөр рүү нь дайрсан хүмүүсийн нэрсийг хэлж амжжээ.

Нусратыг нас барсны дараа Бангладеш даяар бэлгийн хүчирхийллийн золиос болж байгаа эмэгтэйчүүдийг дэмжсэн олныг хамарсан жагсаал цуглаан явагдаж эрх баригчдыг сандраасан юм. Жагсагчид охины үхэлд буруутай хүмүүсийг хатуу шийтгэхийг шаардаж байсныг эрх баригчид ийнхүү ёсоор болгосон бололтой.


Сэтгэгдэл (2)

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
202.179.31.7 |   2019/10/25
Ашгүй дээ. Ядаж тэр муухай амьтдад хийсэн хэргийг нь үүрүүлдэх нь.
Хариулах
64.119.16.183 |   2019/10/25
Олны хүч оломгүй далай гэж
Хариулах