Эстонийн Барилгын компаниудын холбоо нь эрх баригчдад хандан Украйнаас ирж байгаа хөдөлмөрийн цагаачдыг "чип"-лэх санал гаргасан тухай "Baltnews.ee" сайт мэдээлжээ. Тодруулбал Украйнаас асар олноор орж ирж байгаа хөдөлмөрийн цагаач бүрд шаардлагатай мэдээллийг хийж хадгалуулсан тусгай чип бүхий карт өгөх нь зүйтэй гэж үзжээ. Эстонийн цагаачлалын албаныхан украйны хөдөлмөрийн цагаачдыг хянаж дийлэхээ байсан тул Эстонийн компаниуд тэднийг зохих татвар, төлбөр төлөлгүйгээр ажилд авах нь түгээмэл болсон тул ийм санал гарсан гэж байна. Эстонийн компаниуд нь украйн ажилчин хөлслөхдөө Польшийн компанид ажилчнаар бүртгэлтэй хүмүүсийг ажилд авдаг. Европын холбооны дүрэм ёсоор Польшид бүртгүүлэхдээ холбогдох хураамжийг төлсөн нөхцөлд Эстонид давхар татвар төлөх ёсгүй аж. Украйн цагаачдад чиптэй карт олгож эхэлснээр Эстонийн нутгаар хийж байгаа шилжилт хөдөлгөөн, ажиллаж байгаа газар, авсан цалин гэх мэт шаардлагатай мэдээллийг цаг тухайд нь авч байх боломжтой болох юм гэнэ. Үүнээс өмнө Эстонийн Дотоод хэргийн сайд Март Хельме нь Украйнаас нь хөдөлмөрийн цагаач маш олноор хүлээн авч байгаа тул Африкийн орнуудаас цагаач хүлээн авахгүй гэж мэдэгдсэн. Ийнхүү Европын холбоонд мал, нохой мэт чиплүүлэх дээрээ тулсан украйн цагаачид энэ жилийн байдлаар эх орон руугаа нийт 12 тэрбум доллар явуулах төлөвтэй байгааг гэдгийг Украйны Эдийн засаг, худалдаа ба хөдөө аж ахуйн сайд Сергей Николайчук "РБК-Украина" сайтад ярилцлага өгөхдөө мэдэгдсэн байна. Тэрээр "Энэ жил 12 тэрбум орчим доллар байхыг үгүйсгэхгүй байна. Хөдөлмөрийн цагаачдаас нутаг руугаа явуулж байгаа мөнгөн шилжүүлэг нь Украйн дахь долларын ханшинд нөлөөлдөг. Энэхүү мөнгөн урсгал сүүлийн таван жилд огцом өссөн. Харин цаашдаа хөдөлмөрийн цагаачдын мөнгөн шилжүүлэг мөн адил огцом өснө гэж бодохгүй байна" гэжээ.
Сэтгэгдэл (0)
Сэтгэгдэл бичигдээгүй байна