Киргизийн Гадаад хэргийн сайд Чингиз Айдарбеков нь киргиз ажилчдыг Японд ажиллуулах боломж, хэтийн төлөвийн талаар Японы Хууль зүйн сайд Кацуюки Каваитай уулзаж ярилцсан тухай ГЯЯ-ны хэвлэлийн албанаас нь мэдээлжээ. Киргизийн эрх баригчид өмнө нь Японы Засгийн газраас тодорхойлж өгсөн "Тусгай дадал 1", "Тусгай дадал 2" категорийн визийн шаардлагад нийцсэн ажлын хүч бэлдэх ажлыг хэрэгжүүлээд эхэлсэн тухайд Чингис Айдарбеков Японы сайдад дуулгасан байна.
Үүний хариуд Японы Хууль зүйн сайд нь шинээр баталсан журмын дагуу Японы эрх баригчид таван жилийн дотор 345 мянган киргиз ажилчинд хөдөлмөрийн виз олгох төлөвлөгөөтэй байгаа гэдгээ дуулгасан аж. Киргиз ажилчид Японы барилга, үйлчилгээний салбар, авто машины үйлчилгээний газруудад ажиллах юм байна.
Ташрамд сонирхуулахад, киргиз цагаачид 2019 оны 1-6 дугаар саруудад эх орон руугаа 1 тэрбум 126,4 сая доллар явуулснаас 90 хувь нь ОХУ-д ажилладаг хөдөлмөрийн цагаачдаас, 14,9 сая долларыг АНУ-аас, үлдсэн 6,5 сая долларыг бусад орнуудаас явуулсан байна. Харин ийнхүү Япон руу олон зуун мянган ажилчин албан ёсоор гарган ажиллуулах гэрээ хийж байгаа тул хөдөлмөрийн цагаачдаас нутаг руугаа явуулдаг мөнгөн дүн ба мөнгөн шилжүүлгийн бүтцэд нэлээд өөрчлөлт орох бололтой.
Сэтгэгдэл (0)
Сэтгэгдэл бичигдээгүй байна