Украйны Хүнсний аюулгүй байдал ба хэрэглэгчдийн эрх ашгийг хамгаалах алба нь "saiga tatarica" буюу бөхөн гөрөөсийг БНХАУ руу экспортлох тухай гэрээ байгуулсан байна. "Бөхөн", "Украйн" гэхээр нийцэхгүй мэт санагдаж болох ч дэлхийн улаан номд орсон энэ амьтныг XIX зууны сүүл ХХ зууны эхээр Украйны "Аскания Нова" дархан цаазат газар авчран нутагшуулсан нь одоо ч өсөж үржин байдаг тул ийм гэрээ байгуулсан юм байна. Харин Хятадын компани нь энэхүү дархан цаазат газраас худалдаж авсан бөхөн үржүүлэх зорилгоор Украйны Херсон мужид нэлээд том газар түрээслэн аваад удалгүй ийм гэрээ байгуулсан аж. Тодруулбал, Украйнд үржүүлсэн бөхөнг Хятад руу нийлүүлэх санамж бичигт энэ оны есдүгээр сарын 4-нд гарын үсэг зураад байсан нь одоо ийнхүү гэрээ болон хэрэгжихээр болсон байна. Хятадууд албан ёсоор бол улаан номд орсон ховор амьтныг өсгөж үржүүлэх, тоо толгойг нь олшруулах зорилготой гэж байгаа ч үнэн хэрэг дээрээ үржүүлсэн бөхөнгийнхөө арьс шир, эвэр, туурайг нь Хятад руу экспортлон ашиг олон сонирхолтой юм байна. Бөхөнгийн эврийг олон төрлийн өвчин эмгэгийн үед хэрэглэдэг тан бэлдэхэд ашигладаг, 1 кг нь 350 доллар хүрдэг гэж бичсэн байна. Бөхөн нь байгаль дээр Казахстан, Узбекистан, Киргиз, Туркмен, Орос, Монгол гэсэн улсуудад л цөөн тоо толгойгоор хадгалагдан үлдээд байгаа ховор амьтан.
Сэтгэгдэл (0)
Сэтгэгдэл бичигдээгүй байна