Оросын цэргийнхэн тив алгасагч пуужин харван туршжээ

Оросын цэргийнхэн Астрахан муж дах Капустин Яр хээрийн сургуулийн талбараас тив алгасагч "Тополь" баллистик пуужинг харван туршсан тухай ОХУ-ын Батлан хамгаалах яамны хэвлэлийн албанаас мэдээлсэн байна. Оросын КапустинЯраас харвасан "Тополь" пуужин нь Казахстан улсын нутаг дээрх Сары-Шаган сургуулийн талбар дээр бай амжилттай оносон гэж байна. Энэ хоёр талбарын хооронд 2200 км-ийн зайтай байдаг аж.

Энэхүү сургуулийн харвалт нь баллистик пуужингийн байлдааны бэлэн байдлыг шалгах үүднээс гүйцэтгэсэн. Үүний өмнө зургаадугаар сард "Тополь" пуужинг Сары-Шаган талбар руу харван туршиж байсан. ОХУ нь цаашдаа баллистик пуужингийн сургалтын харвалтын тоог цөөрүүлэх шийдвэр гаргасан гэж байна. Иймд дараагийн жилүүдэд Стратегийн зориулалттай пуужин цэргийн бие бүрэлдэхүүний бэлэн байдлыг хангах ба ашиглалтын хугацааг нь сунгасан пуужингийн бүх системүүд хэвийн ажиллаж байгааг шалгах үүднээс л цөөн тооны пуужин харваж турших аж.

Стратегийн пуужингийн "Тополь" РТ-2ПМ цогцолборын гурван шатлалт хатуу түлшээр ажилладаг пуужинг 1988 онд зэвсэглэлд авч байжээ. 45 тонн гарааны жинтэй баллистик пуужин нь 1 гаруй жинтэй цэнэгт хошууг 11 мянган км хүртэлх зайнд хүргэх чадвартай. Ийм пуужингийн стандарт цөмийн хошуу нь 550 килотонны хүчин чадалтай байдаг. Туршилтын харвалтын үнэ ойролцоогоор 11 тэрбум рубль.