2018 оноос хойш 600 гаруй пакистан охидыг Хятад руу айлын эхнэр болгон зарсан тухай "Associated Press" агентлаг мэдээлсэн байна. Хүний наймаачдын золиос болсон ядуу айлын 629 охидын нэр бүхий жагсаалтыг тус агентлагийн сэтгүүлчид олж авчээ. Ийм жагсаалт гэх мэтээр Хятадыг чиглэсэн хүний наймаатай холбоотой маш их баримт, нотолгоо байсаар атал Пакистаны хууль сахиулах байгууллагынхан эрх баригчдынхаа зүгээс маш ширүүн дарамт шахалттай тулж байгаа тул мөрдөн байцаалт явуулахгүй байгаа гэж "Associated Press" онцолжээ. Пакистаны эрх баригчид эдийн засгийн хүнд байдалд ороод байгаа бөгөөд БНХАУ нь ийм нөхцөлд элдэв болзол тавилгүйгээр санхүүгийн дэмжлэг үзүүлж байгаа гол эх үүсвэр болсон. Иймд хүний наймаа, тэр дундаа охидыг эхнэргүй эрчүүдэд эхнэр болгон худалддаг тун харгис наймаанд олон арван хятад иргэд оролцсон хэргийг олон нийтэд ил болгон Хятадтай харилцаагаа муутгахыг Пакистаны эрх баригчид хүсэхгүй байгаа гэж байна. Жишээлэхэд, 2019 оны аравдугаар сард хүний наймааны хэрэгт буруутгагдсан Хятадын иргэн 30 гаруй хүнийг Пакистаны шүүхээс цагаатган суллаж тавьсан явдал үүнийг гэрчилж байна гэж "Associated Press" үзсэн байна.
Сэтгэгдэл (0)
Сэтгэгдэл бичигдээгүй байна