"Reuters" агентлаг нь нэрийг нь хэлээгүй албан ёсны бичиг баримт дээрх мэдээллийг үндэслээд АНУ –ын арми газрын ховор элемент дахин боловсруулах үйлдвэр барихыг ажлыг санхүүжүүлэхээр төлөвлөж байгаа тухай мэдээлсэн байна. Тус баримт бичигт дурдсанаар АНУ-ын арми нь зэвсэглэлд ашиглагддаг илүү ховор төрлийн элементүүд болох хүнд төрлийн газрын ховорэлементүүдийг үйлдвэрлэх туршилтын үйлдвэрийн үнэ өртгийн талаарх асуулгыг өнгөрсөн сард энэ чиглэлд ажилладаг компаниудад явуулсан гэж дурдсан байжээ.
Туршилтын үйлдвэр барих үнийн асуулгыг "Ucore", "Texas Mineral Resources Corp", "Lynas Corp"ба"Blue Line Corp"-ын хамтарсан үйлдвэрүүд авсан байж магадгүй гэдгийг нөхцөл байдлын талаарх мэдээлэлтэй эх сурвалжууд нь "Reuters" агентлагт хэлжээ.
Америкийн арми нь туршилтын үйлдвэр барих ажлын 2/3 хүртэлх хувийг санхүүжүүлэх төлөвлөгөөтэй байгаа ч хэдий хэмжээний хөрөнгө оруулалт хийх талаар дурдаагүй юм байна.
Мэргэжилтнүүд газрын ховор элемент дахин боловсруулах туршилтын үйлдвэр нь байршил, хэмжээ болон бусад хүчин зүйлсээс шалтгаалаад 5 саяас 20 сая долларын өртөгтэй байж болох ч бүрэн хэмжээний үйлдвэр барихад 100 сая гаруй доллар шаардагдана гэж "Reuters"-т тайлбарлажээ.
БНХАУ нь газрын ховор элементийн дэлхийн үйлдвэрлэлийн 80 хувийг, АНУ-ын газрын ховор элементийн импортын 80 хувийг эзэлдэг аж. Ахуйн зориулалттай электрон бараанаас эхлээд өндөр технологи бүхий зэвсэглэл үйлдвэрлэхэд хэрэглэдэг чухал элементүүдийн салбарт БНХАУ ноёлох байр суурьтай байгаад Америкийн Батлан хамгаалах яам ихэд түгшиж байгаа бололтой.
Газрын ховор элементийн олборлолт ба дахин боловсруулалтаараа Хятадын дараа ордог Австралийн "Lynas Corporation Ltd" нь тавдугаар сард Техасын "Blue Line Corp"-той Америкийн нутаг дээр газрын ховор элементүүдийг дахин боловсруулах үйлдвэр барих талаар харилцан ойлголцлыг санамж бичигт гарын үсэг зурсан байна.
Сэтгэгдэл (0)
Сэтгэгдэл бичигдээгүй байна