АНУ-ын Ерөнхийлөгчийн захиргаа Афганистан дах цэргийн албан хаагчдынхаа тоог ахин 4 мянгаар цөөлж, 8,9 мянгыг үлдээх шийдвэрийг энэ долоо хоногт гаргах гэж байгаа тухай NBC суваг мэдээлсэн байна. Тус сувгийн Америкийн Ерөнхийлөгчийн захиргаад ажиллаж байсан болон ажиллаж байгаа гурван эх сурвалжийн мэдээлснээр тушаал энэ долоо хоногт гарах ч цэргийг гаргах ажиллагаа нь солигдож ирэх ээлжийг явуулахгүй байх замаар нэлээд хэдэн сарын турш үргэлжилнэ гэж мэдэгдсэн байна.
АНУ-ын Батлан хамгаалахын сайд Марк Эспер өнгөрсөн аравдугаар сард Кабулд айлчлах үеэрээ АНУ нь Афганистан дах алан хядагч бүлэглэлүүдтэй хийх тэмцлээ сулруулалгүйгээр тэндэх цэргийн албан хаагчдынхаа тоог 8,6 мянга хүргэх боломжтой гэж мэдэгдэж байсан. Афганистанд одоогийн байдлаар Америкийн 14 мянган цэргийн албан хаагч байрлаж байгаа аж.
Афганистан дахь цэргийн ажиллагаа 2001 оны есдүгээр сараас хойш өдийн хүртэл 18 жилийн турш үргэлжилж байгаа юм. Алан хядагчдын эсрэг олон улсын энэхүү ажиллагааны оргил үеэр буюу 2010-2013 онуудад Афганистанд АНУ, НАТО болон холбоотнуудын 150 мянган цэргийн албан хаагчид байрлаж байсан бол 2014 оноос үндсэн хүчээ тус улсаас гаргасан.
Сэтгэгдэл (0)
Сэтгэгдэл бичигдээгүй байна