Туркийн үндэсний баялгийн сан (TVF) газрын тос боловсруулах ба нефтхимийн салбарын гадаад худалдааны алдагдлаа багасгахын тулд Адан мужийнхаа Жейхан районд газрын тос боловсруулах ба нефтьхимийн үйлдвэр барихад 10 тэрбум долларын хөрөнгө оруулалт хийхээр болсон байна.
Энэхүү төслийг хэрэгжүүлэн үйлдвэр барих шатанд 10 мянган ажлын байр шинээр бий болох бол үйлдвэрүүд ашиглалтад орсны дараа 5 мянган хүн байнгын ажлын байртай болох юм байна. Төслийн дагуу баригдах үйлдвэрүүд нь нэр дурдагдсан салбарыг хөгжүүлэхэд шаардлагатай түхий эдээр хангахаас гадна дэд бүтцэд нь ихээхэн хөрөнгө оруулалт хийгдэх аж.
Турк нь нефтьхимийн үйлдвэрлэлийн бүтээгдэхүүнийхээ 80 гаруй хувийг импортоор оруулж ирдэг бөгөөд энэ салбарын гадаад худалдааны алдагдал нь 2018 оны байдлаар 13 тэрбум долларт хүрчээ.Туркийн үндэсний баялгийн сангийн хөрөнгө оруулалтаар байгуулагдах үйлдвэр нь гадаад худалдааны тэнцлийн энэ салбарын алдагдлыг жил болгон 1,5 тэрбум доллароор багасгана гэж төлөвлөсөн аж.
Туркийн үндэсний баялгийн санг Ерөнхийлөгч Эрдоганы санаачилгаар 2016 онд байгуулж байжээ. Энэ сан нь стратегийн чухал ач холбогдолтой активуудын үнийг нэмэгдүүлэх, эдийн засгийн өсөлтийг эрчимжүүлэх, шинэ бүтээгдэхүүн нэвтрүүлэх замаар хөрөнгийн зах зээлийг гүнзгийрүүлэх зорилготой. Одоогоор энэ сан нь Turkish Airlines, Ziraat Bank, Halkbank, газрын тосны Türkiye Petrolleri,Botaş компаниудыг удирдаж байна.
Сэтгэгдэл (0)
Сэтгэгдэл бичигдээгүй байна