АНУ-ын Луизиан мужийн Шинэ Орлеан хотын захиргаа, үйлчилгээний систем хакеруудын дайралтад өртөн зогссон тул хотод онц байдал зарласан тухай TechCrunch мэдээлсэн байна. Хотын захиргааны компьютерийн системүүд кибер дайралтад өртсөн анхны шинж тэмдэг арванхоёрдугаар сарын 13-нд бүртгэгдсэн аж. Халдвар цаашдаа сүлжээгээр тархахаас сэргийлэх үүднээс хотын захиргааны бүх серверүүд, компьютеруудыг унтраахаар шийдвэрлэсэн гэж байна. Хакерууд мэдээллийг нууцлагч вирус ашиглан дайралт хийсэн аж. Хакерууд бүх мэдээллийг нууцалсны дараагаар эргэн сэргээхийн тулд мөнгө төлөхийг шаарддаг.
Хотын удирдлагууд холбооны тусгай албадын дэмжлэгтэйгээр дайралтын хэргийг шалгаж эхэлсэн бөгөөд кибер дайралтын аюулыг бүрэн арилгасны дараа хотын бүх компьютерын системүүдийг сэргээх аж.
Үүнээс өмнө АНУ-ын хэд хэдэн жижиг хот хакеруудын дайралтад өртөн иргэдэд үйлчлэх системээ хяналтаас алдаж байсан. Тухай бүрд хакерууд системийг эргэн сэргээхийн тулд ойролцоогоор 300 мянган доллартой дүйцэх хэмжээний биткойн шаардан авч байсан байдаг. Учир нь, гэмт этгээдүүдийн нэхсэн мөнгийг өгөлгүйгээр өөрсдөө системийг сэргээхэд гаргах зардал нь 300 мянган доллароос хамаагүй их болж таарч байжээ.
Сэтгэгдэл (0)
Сэтгэгдэл бичигдээгүй байна