Чех улсын Зам тээврийн яамнаас 16 сая еврогоор сайт ба аппликейшн хийлгэх гэж тендер зарлаад байтал программистууд сайн дураар үнэгүй хийж Засгийн газартаа бэлэглэсэн хэрэг маш их дуулиан тариад байгаа тухай Novinky.cz сайт мэдээлж байна.
Хурдны замаар зорчих зөвшөөрөл худалдах сайт ба ухаалаг утасны аппликейшн хийх тендерийг яамныхан ийм өндөр өртгөөр хийхээр төлөвлөсөн төдийгүй тендерийг хаалттай явуулах болсонд ч программистууд ихэд бухимджээ. Улмаар “Actum Digital” гэдэг IT компанийн эзэн Томаш Вондарчек нь Чехийн программистуудад хандан тендерийн бүх нөхцөл, шаардлагад нийцсэн бүтээгдэхүүнийг үнэгүй хийж өгөх уриалга гаргасан байна. Түүний саналыг 300 гаруй мэргэжилтнүүд дэмжин хамтран ажиллахад бэлэн гэдгээ мэдэгдэж. Улмаар 60 гаруй программистуудаас бүрдсэн сайн дурын бүлэг хакатон хийж, амралтын хоёр өдөр суугаад 16 сая евро буюу 48 тэрбумаар хийлгэх гэж байсан сайт, аппликейшн хоёрыг нь үнэгүй хийж дуусгаад, төрдөө бэлэглэжээ.
/Хакатон гэдэг нь “hack + marathon” гэсэн хоёр үгийн нийлбэр бөгөөд бүтээгдэхүүн гаргахын тулд баг бүрдүүлж, хэдэн цаг, эсвэл хэдэн өдрийн турш хамтдаа ажиллахыг хэлдэг./
Энэ мэдээ олон нийтэд хүрсний дараа Чех улсын Ерөнхий сайд программистуудын ажилтай газар дээр ирж танилцаад сайт ба аппликейшн хийх хаалттай тендер явуулах гэж байсан Зам тээврийн сайд Владимир Кремликийг ажлаас нь халжээ. Ухаалаг бүтээгдэхүүн гаргах нэрийдлээр, хүн амын дийлэнх хэсэг нь энэ талааар тун бүдэг бадаг ойлголт төсөөлөлтэй байдгаар далимдуулан улсын их хэмжээний мөнгө идэж шамшигдуулах гэсэн оролдлогыг ийнхүү амжилттай таслан зогсоож чаджээ.
Сэтгэгдэл (0)
Сэтгэгдэл бичигдээгүй байна