2020/04/01
USD 2,773

Эрчимтэй хайлж байгаа мөсөн голынхоо усыг савлаж зарна

Б.Бадрал
2020/02/18

Гринланд арлын Засгийн газар нь сүүлийн жилүүдэд эрчимтэй хайлах болсон мөсөн голын усыг савлаж эрхийг арилжааны компаниудад зарна гэсэн байна. Тус улсын Эрчим хүчний сайд Йесс Сване энэ тухайгаа “Der Tagesspiegel” сэтгүүлд ярьжээ. Одоогоор Гринландын мөсөн голын усыг экспортлох 9 төслийг бэлэн болгоод байгаа аж. Дэлхийн цаг агаарын өөрчлөлтийг дагаад ган гачиг, үер гэх мэт байгалийн онц аюултай үзэгдлийн тоо, давтамж, хамрах хүрээ нэмэгдэхийн дагаад дэлхий даяар ундны ус улам хомсдох болно гэдгийг Йесс Сване онцолсон байна. Ийм нөхцөлд Гринландын мөсөн голын цэвэр ус дэлхий даяар борлогдох боломжтой болно гэж тооцсон аж. Мөн эрчимтэй хайлж байгаа мөсөн голын усыг савлан экспортолж зарахгүй бол оргүй хоосон руу урсаж алга болно гэжээ.

Гринланд арлын 84 хувь нь мөсөөр хучигдсан байдаг. Энэ бол Их Британийн газар нутгаас долоо дахин их нутаг зарим газраа олон км-ийн зузаантай мөсөн хучлагаар бүрхэгдсэн байдаг гэсэн үг. Гринландын бүх мөс хайлбал дэлхийн далайн түвшин 7 метрээр нэмэгдэнэ гэсэн судалгаа ч бий. Сүүлийн жилүүдэд дэлхийн дулаарлын улмаас энэхүү мөсөн хучлага эрчимтэй хайлж, зарим газар мөсөн хучлагын дор том гол мөрөн үүсээд байгааг эрдэмтэд тогтоосон байна. 2003 оноос хойш Гринландын мөсөн бүрхүүлээс хайлсан 3,5 их наяд тонн цэвэр ус далайд урсан оржээ.

Харьцуулахад голын газарзүйч Ж.Цэрэн­содном Монгол Алтайн нуруунд нийт 702 км.кв талбай бүхий  240-н мөсөн гол байгааг тооцож гаргасан байдаг аж. 2016 онд судалгаа хийхэд мөсөн голын талбай 45 хувиар буурсан болохыг тогтоосон байдаг.


Сэтгэгдэл (0)

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.

    Сэтгэгдэл бичигдээгүй байна