Америкийн скаутуудын хамгийн том байгууллага болох “Америкийн бойскаутууд” /Boy Scouts of America-BSA/ нь нэр дээр нь ирж байгаа бэлгийн дарамт, хүчирхийлэлтэй холбоотой нөхөн төлбөр шаардсан нэхэмжлэлүүдээс зайлсхийхийн тулд төлбөрийн чадваргүй болсон гэж албан ёсоор зарласан байна. “Los Angeles Times” сонины бичиж байгаагаар олон зуун ийм нэхэмжлэл шүүхэд ирээд байгаа, цаашид улам нэмэгдэх хандлагатай байсан тул ийнхүү дампуурлаа зарласан гэж хохирогчдын өмгөөлөгчид тайлбарласан байна. Төлбөрийн чадваргүй гэсэн “Америкийн бойскаутууд” байгууллагын дансанд 1,4 тэрбум долларын актив байгаа гэж байна.
Өмнө нь Америкийн Католик шашны сүм хийдүүд үүнтэй яг адил бэлгийн дарамт, хүчирхийлэлтэй холбоотой нөхөн төлбөр шаардсан олон нэхэмжлэлээс өмч хөрөнгөө хамгаалахын тулд яг ингэж төлбөрийн чадваргүй болсон мэдэгдэн дампуурлаа зарлаж байсан аж. Дампуурлаа албан ёсоор зарласан байгууллагын нэр дээр нөхөн төлбөр шаардсан нэхэмжлэл явуулахад шүүх хүлээж авдаггүй юм байна. Мөн дампуурал зарласны дараа үлдсэн өмч хөрөнгийг бүртгэх, баталгаажуулах, улмаар шүүхээс шийдсэн нэхэмжлэлийн хариуцагчийг тодорхойлох ажил нь хэдэн жилээр үргэлжилдэг аж. Энэ хугацаанд хохирогчидтой шүүхээс гадуур, харьцангуй бага мөнгө төлж тохиролцох, зарим нь тэр бүх хугацаанд өмгөөлөгч хөлсөх мөнгөгүй зэргээс нэхэмжлэлээ буцаан авах боломжтой болдог.
2012 оны Орегон мужийн дээд шүүхийн шийдвэрээр “Америкийн бойскаутууд” байгууллагын сайн дурын ажилтнууд 1965-1985 онуудад хөвгүүдэд бэлгийн дарамт учруулсан, хүчирхийлсэн олон мянган хуудас баримт олон нийтэд ил болгосон. Үүний дараанаас хүүхэд байхдаа тус байгууллагын гишүүн болж, зуны амралтаа өнгөрөөдөг байсан олон зуун хүн нөхөн төлбөр шаардан нэхэмжлэл гаргах болсон аж. Бэлгийн дарамт учруулсан, хүчирхийлэл үйлдсэн гэж буруутгагдсан хүмүүс нь скаутуудын зусланд сайн дураар ажиллахаар ирсэн нэр хүндтэй цагдаа, цэргийнхэн, эмч зэрэг хүмүүс байжээ.
“Америкийн бойскаутууд” байгууллага нь 1910 онд үүсгэн байгуулагдсан бөгөөд 110 сая хүн тус байгууллагын гишүүн болж, үйл ажиллагаанд нь идэвхтэй оролцож байжээ.
Сэтгэгдэл (0)
Сэтгэгдэл бичигдээгүй байна