АНУ-ын тусгай төлөөлөгч Залмай Халилзад нь талибуудтай байгуулах энхийн гэрээний талаар ярилцахаар Афганистаны Ерөнхийлөгч Ашраф Ганитай уулзсан тухай “Reuters” агентлаг мэдээлж байна. Америкийн тал нь Талибан хөдөлгөөнтэй гал зогсоох тухай хэлэлцээ идэвхтэй хийж байгаа бөгөөд зарим зүйлс дээр тохиролцож чадвал энэ сарын сүүлээр энхийн гэрээ байгуулснаар Америкийг тус улсаас цэргээ гаргах боломж бүрдэх боломжтой гэж үзэж байгаа юм. Энэ талаарх хэлэлцээрт Катар улс зуучилж, бүх хэлэлцээ Катарт явагдаж байгаа.
Гэвч Талибан хөдөлгөөн нь Афганистаны Ерөнхийлөгч Ашраф Гани болон бусад удирдлагуудыг америкчуудын тоглоомын хүүхэлдэйнээс цаашгүй гээд ямар уулзалт хэлэлцээ хийхээс эрс татгалздаг. Ийм ч учраас Афганстаны Засгийн газрын төлөөлөл Катарт болж байгаа хэлэлцээрт оролцоогүй. Энэ бол Америкчууд цэргээ гаргалаа л бол талибууд зэвсгийн хүчээр төр эргүүлж, одоогийн Засгийн газар, Ерөнхийлөгчийн эсрэг шинэ дайны эхлүүлнэ гэсэн сануулга гэдэгтэй шинжээчид санал нийлж байна. Америкчууд энэ олон жил асар их зардал гарган байж Афганистанд бий болгосон бүхнийг ахар богино хугацаанд үгүй хийнэ гэсэн үг. Иймд Америкийн тусгай төлөөлөгч Залмай Халилзад нь Афганистаны удирдлага ба Талибан хөдөлгөөний хооронд зуучлагчийн үүргийг давхар гүйцэтгэхээс өөр аргагүй болсон нь энэ аж.
Өмнө нь Зөвлөлтийн цэрэг Афганистанд байж байгаад гарахдаа өөрийн талыг баримтлагч Нажибуллагийн дэглэмийг зэвсэг, сумны хангамжгүй орхисон нь тун таагүй үр дагаварт хүргэсэн гашуун сургамж Афганистанд бий. Горбачев цэргээ Афганистанаас гаргасны дараа АНУ-ын Ерөнхийлөгч Рейгантай сэм тохиролцож Нажибуллад сум, зэвсгийн тусламж үзүүлэхээ зогсоосон. Үүний улмаас Нажибулла нь талибан хөдөлгөөн оролцсон сөрөг хүчнийхэнд ялагдсан. Улмаар Кабул дах НҮБ-ийн байранд нуугдаж байхад нь тус байгууллагын нэгэн ажилтан 10 мянган долларын хахууль авч байршлыг зааж, талибуудад Нажибуллаг барьж өгсөн гэдэг. Талибууд Нажибуллаг барьж авсны дараа аймшигтай хэрцгийгээр тамлан зовоож, амьдаар нь нурууных нь махыг шулж алсан тухай цөөнгүй баримт, дурсамж хадгалагдан үлдсэн байдаг. Магадгүй ийм учраас Афганистаны одоогийн удирдлага нь Америк ба Талибан хөдөлгөөний хооронд Катарт явж байгаа хэлэлцээнд тун үл итгэсэн байр сууринаас хандаж байгаа байж болох юм.
Сэтгэгдэл (0)
Сэтгэгдэл бичигдээгүй байна