Австралийн оршин суугч ухаалаг утасны аппликейшн ашиглаад арьсны хорт хавдраа эрт илрүүлж амжилттай хагалгаа хийлгэсэн талаар “Daily Mail” мэдээлжээ.
Питер Уилсон гэдэг 68 настай хуйхны халзарсан хэсгийн арьс нь олон жилийн турш хуурайшиж, улаавтар өнгөтэй толботой болсныг тоолгүй явж иржээ. Гэтэл 2019 оноос толбонууд томорч, үрэвсэж эхэлсэнд фото зургаар арьсны хорт хавдар үүсэх эрсдэлийг ялгаж таньдаг аппликейшн утсандаа суулган шалгаж үзэхээр шийдсэн байна. Ингээд толбонуудынхаа зургийг автал аппликейшн нь нэн даруй арьсны эмчид үзүүлэх шаардлагатай гэж зөвлөсөн байна. Зөвлөсний дагуу арьсны эмчид үзүүлэн эдийн дээж авч шинжлэхэд эхний шатандаа яваа хавтгай эсийн хорт хавдар гэсэн онош тавьжээ. Улмаар хагалгаа хийлгэж хорт хавдар туссан хуйхыг нь авч, гуянаас нь авсан арьсаар нөхсөн нь амжилттай болжээ. Уилсон энэ талаар ярихдаа толгой, хөлийнхөө боолтыг байнга солих хэцүү байсан гэсэн байна. Гэхдээ хорт хавдрыг бусад эд, эрхтэн рүү үсэрхийлэхээс өмнө амжиж илрүүлэхэд тус болсон аппликейшнд их баярлаж байгаа гэжээ.
Уилсоны арьсны хорт хавдар нарны хэт ягаан туяаны үйлчлэлээр үүссэн аж. Иймд одоо тэр гудамжинд гарахдаа ямагт малгай өмсдөг болсон бөгөөд бусад хүмүүсийг нарны хэт ягаан туяанаас хамгаалах замаар арьсны хорт хавдраас сэргийлж байхыг уриалжээ.
Сэтгэгдэл (0)
Сэтгэгдэл бичигдээгүй байна