Хуурай ваннд 5 хоног хэвтэх ажилд сайн дурынхныг бүртгэж байна

Европын сансрын агентлаг ажлын тав хоногийн туршид ваннд хэвтэх цалинтай түр ажилд сайн дурынхныг бүртгэж байгаа юм байна. Тус агентлаг нь жингүйдэл хүний биед хэрхэн нөлөөлдгийг судлах хүрээнд ийм өвөрмөц туршилт хийж байгаа аж. 2020 оны сүүлээр Францын Тулуз дах Сансрын анагаах ухааны хүрээлэнд (MEDES) явагдах туршилтад оролцох хүн хуурайгаар шумбасан байдалтай 5 хонох ёстой. Ванн дотор ус нэвтрүүлдэггүй даавуугаар ороолгож хэвтэх болохоор хуурай гэж байгаа юм байна. Ингэж хуурай шумбах үед хүний бие Олон улсын сансрын станц дээр жингүйдэлт байгаа сансрын нисгэгчдийнхтэй адил байдалд ордог аж.

Туршилтад оролцохоор шалгарсан сайн дурынханд тодорхой хэмжээний мөнгө төлөх аж. Бүртгүүлэхийг хүссэн хүмүүс http://www.medes.fr/fr/clinique-spatiale/devenir-volontaire.html гэсэн энэ хаягаар ороод мэдээллээ үлдээх боломжтой. Гэхдээ хоолоо зөөлгөж идээд зүгээр хэвтээд байхгүй цусны шинжилгээ, булчингийн эдийн дээж байнга авч биеийн байдлыг нь шалгах аж.