БНХАУ-ын эсминец ангиллын байлдааны усан онгоц Номхон далайд нислэг үйлдэж байсан АНУ-ын тагнуулын P-8A Poseidon нисэх онгоц руу лазер чиглүүлж, нөлөөлөхийг оролдсон тухай АНУ-ын Тэнгисийн цэргийн хүч тусгай мэдэгдэл гаргажээ. Тус мэдэгдэлд “Хоёрдугаар сарын 17-нд Хятадын эсминец усан онгоц нь Гуам арлаас өрнө зүгт 380 бээрийн газар Номхон далайн олон улсын мэдлийн усанд эргүүлж хийж явсан АНУ-ын ТЦХ-ий P-8A тагнуулын нисэх онгоц руу лазер чиглүүлсэн хэрэг гарлаа. Тусгай тоноглолгүйгээр ялган харах боломжгүй лазерыг P-8A дээрх мэдрэгч төхөөрөмжүүд мэдэрч бүртгэсэн болно” гэжээ. Цаашлаад Америкийн онгоц олон улсын дүрэм журмын дагуу нислэг үйлдэж байсан тул лазерын буу чиглүүлэх ямар ч шаардлага байгаагүй гэдгийг онцолсон байна. Улмаар Хятадын байлдааны усан онгоцноос тусгасан лазер нь нисэх онгоц ба усан онгоцны систем болон нисэх багийн бүрэлдэхүүнд ноцтой хохирол учруулж болзошгүй байсан гэж мэдэгджээ. Иймд Хятадын байлдааны усан онгоцны хийсэн үйлдлийг мэргэжлийн бус, аюултай гэж үзсэн байна. Мөн энэхүү үйлдлээрээ Хятадын тал нь Америктай байгуулсан болон олон улсын гэрээ, хэлэлцээг зөрчиж байна гэжээ.
Сэтгэгдэл (0)
Сэтгэгдэл бичигдээгүй байна