Хятад коронавирусийн халдвар авсан ч бүрэн эдгэрсэн хүмүүсийн эзлэх хувь улам нэмэгдэж байгаа талаар “Синьхуа” агентлаг мэдээлж байна.
Тухайлбал, өнгөрсөн долоо хоногт халдвар эдгэрсэн хүний эзлэх хувь нь нийт халдвар авсан хүний 52,1 хувь болж өссөн байна. Тахлын үндсэн голомт гэгдэж байгаа Хубэй муж, түүний төв Ухань хот дах эдгэрэгсдийн эзлэх хувь ч өсөж байгааг Хятадын Эрүүл мэндийн үндэсний комиссын хэвлэлийн төлөөлөгч Ми Фэн мэдэгдсэн байна.
Гэхдээ Хятадын шинэ жилээр олон сая хүн гэртээ түр харих үеэр хөл хорио эхэлснээр хэдэн мянган үйлдвэр ажиллах хүнгүй болж зогссоны дараа асар хохирол амсах болсон. Харин одоо ийнхүү эдгэрсэн хүмүүсийн эзлэх хувь нэмэгдэхийг дагаад Хятадын эрх баригчид гэртээ түгжигдсэн тэр олон сая ажилчин, албан хаагчдыг үйлдвэр рүү нь буцаах арга хэмжээг авч эхэлсэн. Иймд үүнийг дагаад халдвар авсан хүний тоо өсөж магадгүй гэж үзэж байгаа аж. Цаашдаа халдвар авсан хүний тоо огцом өсөхгүй бол үндсэндээ халдварын оргил үе дуусаж, эдгэрэх чиглэл рүү явж байна гэж үзэж эхлэх бололтой.
Сэтгэгдэл (0)
Сэтгэгдэл бичигдээгүй байна