Турк улс нутаг руу нь дүрвэн орж ирсэн 100 мянга гаруй Сирийн дүрвэгчдийг Европын холбооны хилээр нэвтрүүлсэн тухай Туркийн Дотоод хэргийн сайд Сулейман Сойлу мэдэгджээ. Тэрээр “Twitter” хуудсаараа “Манай улсын Эдирнегээр орхин гарсан хүний тоо 100 577 хүн боллоо” гэсэн байна.
Туркийн Ерөнхийлөгч Режеп Тайип Эрдоган нь Европын холбоотой залгаа хилээ нээсэн, цаашид ахиж хилээ хаахгүй тухайгаа мэдэгдээд байсан юм.
Турк нь Европын холбооны Болгар, Грек гэсэн хоёр улстай хиллэдэг. 2016 оны гуравдугаар сард Европын холбоо нь Турк дэх албан ёсны дүрвэгчдийн хүлээн авах, Турк дэх дүрвэгчдийн хуаранг ажиллахад шаардлагатай санхүүгийн дэмжлэг үзүүлсний хариуд Турк хууль бус дүрвэгчдийг өөрийн нутагт түр байршуулахыг зөвшөөрсөн тохиролцоо хийсэн юм.
Үүнээс хойш Турк нь энэ тохиролцоог Европын холбоог илүү дуулгавартай болгоход тун чадварлагаар ашиглаж эхэлсэн гэж зарим шинжээч үзэж байна. Одоо Сирийн Идлибт, курдууд ба Асадын армийн эсрэг явуулж байгаа ажиллагаагаа дэмжүүлэхийн тулд ашиглаж эхэллээ гэж үзсэн байна. Сирийн сөрөг хүчин гэгдээд байгаа тархай бутархай зэвсэгт бүлэглэлүүд удаа дараалан ялагдал хүлээсээр Туркээс өөр зэвсэг, санхүүгийн ил тод дэмжлэг үзүүлдэг ивээн тэтгэгчгүй болсон. Харин Туркийн эрх баригчид нь курд салан тусгаарлагчид, тэднийг дэмжиж байгаа Сирийн курдууд ба Иракийн курдуудын эсрэг тэмцэлдээ Сирийн сөрөг хүчний туршлагатай цэргүүдийг ашиглаж байгаа юм. Хэрэв Сирийн сөрөг хүчнийхэн Туркийн арми, тусгай хүчний техник, онгоц, сум, зэвсгийн тусламж аваагүй бол хэдийн ялагдаж, Турктэй залгаа нутаг Асадын армийн мэдэлд шилжих байсан гэж зарим шинжээч мэдэгдэж байна. Харин одоо туркийн тал дэмжиж байгаа тул тэднийг Турктэй залгаа нутагт Асадын армийг эсэргүүцээд зогсохгүй энэ нутгийн уугуул оршин суугчид болох курдуудын зэвсэгт бүлэглэлүүдийг тун амжилттай шахан холдуулж байгаа аж.
Идлибээс Европын холбоо руу зүглэсэн олон зуун мянган энгийн иргэд гээд байгаа нь Сирийн өнцөг булан бүрээс цуглуулсан сөрөг хүчний хамгийн нөлөө бүхий дайчдын ар гэр, төрөл төрөгсөд байгаа гэнэ. Тэднийг Сирийн бусад нутгийг чөлөөлөх явцад Асадын арми ба Оросын эвлэрүүлэх төвтэй тохиролцсоны дагуу эсэргүүцэл үзүүлэхээ зогсоосны хариуд Идлиб рүү гэр бүл, төрөл төрөгсдийн хамт хэдэн зуу, мянгаар нь гарч явахыг зөвшөөрч ирсэн. Ингэснээр Идлиб нь өөрсдийгөө сөрөг хүчин гэгддэг, Засгийн газар ба Оросууд нь алан хядагчид гэгддэг хүчний хамгийн том төвлөрөл болж хувираад байсан юм.
Туркийн нутгаас Европын холбоо руу орж эхэлсэн энэ удаагийн давлагаан дотор, Асадын эсрэг хамгийн идэвхтэй, үр дүнтэй байлдаж явсан туршлагатай ч сахлаа хусан, энгийн хувцас өмсөж зүсээ хувилган хуурамч бичиг баримт авсан дайчид маш олон байгаа нь Европын холбооны удирдлагын санааг хамгийн их түгшээж байгаа аж. Иймдээ ч тэд Орос ба Асадыг буруушаасан, Эрдоганыг дэмжсэн мэдэгдлүүд ар араасаа хийж эхэлжээ. Европын холбооны зүгээс хүчтэй дарамт шахалт үзүүлэх замаа Оросыг Асадын армид Идлибийн орчим агаарын хүчтэй дэмжлэг үзүүлэхийг зогсоохыг хамгийн ихээр хичээж байгаа гэж шинжээчид үзэж байна. Ингэвэл техникээр илүү Туркийн арми, тоогоор дутахааргүй сөрөг хүчнийг ашиглан хил залгаа Сирийн бүс нутгийг бүрэн хяналтадаа байлгаад, курдуудыг дарангуйлаад байж чадах аж.
Сэтгэгдэл (0)
Сэтгэгдэл бичигдээгүй байна