Коронавирусийн тархалттай холбоотойгоор Казахстаны эрүүл мэндийн салбарын ажилтнууд, эмч нарыг доромжилсон гутаасан мэдээлэл цөөнгүй явж байгаад тус улсын ЭМ-ийн сайд Елжан Биртанов дургүйцлээ илэрхийлжээ. Тэрээр “Одоо болтол коронавирусээр өвдсөн нэг ч тохиолдол илрүүлээгүй байгаагаас болж манай эмнэлгийн ажилтнуудыг ямар их даапаалж, доромжилж байна вэ? Бид коронавирус орж ирэх магадлалыг үгүйсгэхгүй байна. Бид бусад улсаас хол илүү биш ч бас муу биш. Манайд асуудал их бий ч ажлаа хийж, дуудлагыг хүлээн авахад хүчлэн бэлдэж байна. Хүмүүс эх орон нэгтнүүдээ хамгаалах гэж өөрсдийгөө үл тоон ажиллаж байна. Гэтэл хариуд нь үл итгэсэн байдал гаргаж, шоолж, даапалж байдаг” гэжээ.
Казахстан улс нь БНХАУ-тай хиллэдэг ч манайхтай адилаар газар нутаг дээр нь коронавирусийн ганц ч тохиолдол бүртгэгдээгүй байгаа юм. Гэхдээ манайхаас ялгаатай нь эмч, эмнэлгийн ажилтнуудаа иргэдийн зүгээс дэмжихэд огт анхаардаггүй бололтой юм. Ингээд зогсохгүй зарим иргэд нь хэрүүл дэгдээж, лайк авахын тулд интернэтээр худал мэдээлэл цацах нь хэрээс хэтэрч байгаад Казахстаны ЭМ-ийн сайдын урам ихэд хугарчээ. Тэрээр Казахстаны эмч нар ОХУ, БНХАУ ба өөрийн үйлдвэрлэсэн оношлуур ашиглан 800 гаруй хүнд шинжилгээ хийлгэсэн, өөрсдийн шинжилгээгээ Англи дах ДЭМБ-ын лабораторид давтан магадлуулахад адил сөрөг гарсан тул үл итгэх, эмч нарыг даапаалах, гоочлох ямар ч үндэслэл байхгүй гэдгийг онцолжээ. Тэрээр “Лайк нь та нарын орлогыг нэмэгдүүлж болох ч дархлааг чинь сайжруулахгүй шүү” гэжээ.
Коронавирусийн тохиолдол бүртгэгдсэн улс болгоныг голомтот гэж тооцдог. Ийм голомтот орнуудад Казахстаны 95 мянга гаруй иргэд байгаа гэж байна. Тухайлбал, Өмнөд Солонгост 35 мянга, АНУ-д 40 мянга, Эмиратад 5100, Италид 1800, Францад 1000, Германд 5000 гаруй казах иргэд байгаа аж. Хилийн чанадад байгаа казах иргэдийн дунд коронавирусийн халдвар авсан нэг ч тохиолдол бүртгэгдээгүй юм байна.
Сэтгэгдэл (0)
Сэтгэгдэл бичигдээгүй байна