Дэлхийн улс орны том ба жижиг бизнес коронавирусийн нөлөөг улам бүр мэдрэх болсон тухай “Еuronews” мэдээлж байна. Өвчин газар авахыг дагаад Хятадын олон сая ажилчид хөл хорионд орж, үйлдвэрүүд нь зогссоны улмаас Европ дах зарим үйлдвэрүүд шаардлагатай эд ангийн гачигдалд ороод эхэлжээ. Шинжээчдийн үзэж буйгаар энэхүү эд ангийн хомсдол энэ гуравдугаар сарын дундуур оргил цэгтээ хүрэхэд Европын олон мянган компаниуд аргагүйн эрхэнд үйлдвэрлээ хумьж, зарим нь түр зогсооход хүрэх аж.
Хятадад үйлдвэрлэсэн эд ангиас хамааралтай компаниуд хамгийн их хохирол амсана. Иймд компаниуд одооноос импортыг орлуулах арга хэмжээ аваад эхэлжээ. Тухайлбал, хэмжих багаж хэрэгсэл, түүний дотор эмнэлгийн хэмжилтийн багаж үйлдвэрлэдэг Францын “STIL” компани үйлдвэрээ зогсоохгүйн тулд олон жилийн өмнө хаагдаад байсан шилэн эдлэл үйлдвэрлэх цехээ эргэн сэргээсэн байна.
Мөн коронавирусийн дэгдэлт нь зөвхөн эд ангийн нийлүүлэлт төдийгүй Европ дах ажлын хүчний шилжилт хөдөлгөөнд нөлөөлж эхэлсэн байна. Жишээлбэл, Умард Италид коронавирус дэгдэж, тухайн бүс нутгийн олон хотод хөл хорио тогтооход “Fiat-Chrysler” компанийн ажилчид олноор ажилдаа явж чадахгүй болжээ. Хэрэв хоригийн үеэр ажилчдыг үйлдвэр рүү хүргэх асуудлыг шийдэхгүй бол ажиллах хүчгүйгээс болж үйлдвэрээ түр хаах дээрээ тулаад байгааг “Еuronews” мэдээлж байна.
Сэтгэгдэл (0)
Сэтгэгдэл бичигдээгүй байна