Туркийн эрх баригчид олон мянган сири дүрвэгчдийг Европын холбоо руу нэвтрэх эрхийг нь өгсний дараа Турктэй хил залгаа Грекийн хилийн дагуу байдал тун хурцадмал байна. Туркийн Эдирне хотын захирагч нь “Грекийн цагдаа ба хилчид дүрвэгчдийн эсрэг хуванцар болон байлдааны сум ашиглан гал нээлээ. Үүний улмаас зургаан хүн шархдаж, нэг нь эмнэлэгт нас барлаа” гэж мэдэгдсэн тухай “Euronews” мэдээлж байна.
Дүрвэгчид өдөрт Грекийн хилийн давах гэж хэдэн зуун удаа оролдож, түүнийг нь Туркий цагдаа нар дэмжиж байгаа тухай бичлэгийг Грекийн эрх баригчид дэлгэжээ. Үүний хариуд Туркийн эрх баригчид сэтгүүлчдийг Эдирнегийн эмнэлэгт хүргэж, Грекийн хилчдэд буудуулсан гэх хүмүүстэй уулзуулжээ.
Үүний хариуд Грекийн Засгийн газрын төлөөлөгч Стелиос Петсас “Турк нь манай улсын эсрэг хуурамч мэдээлэл бэлдэн тарааж байна. Өнөөдөр манай үйлдлийн улмаас шархадсан гэж нэрлэсэн хүмүүсийн тухай ээлжит худал мэдээллийг тараалаа. Би үүнийг эрс шийдэмгий үгүйсгэж байна” гэжээ.
Европын холбооны удирдлага ба Туркийн эрх баригчид яаралтай хамтарсан арга хэмжээ аваагүй нөхцөлд Грекийн хил дээрх байдал хяналтаас гарч магадгүй байгаа тухай ажиглагчид анхааруулж байна.
Сэтгэгдэл (0)
Сэтгэгдэл бичигдээгүй байна