Хятадын судлаачид шинэ коронавирус тархаж эхэлснээс хойш 149 янзын мутацид өөрчлөөгдсөн тухай мэдээлсэн байна. Ингэснээр L ба S гэж нэрлэгдсэн хоёр үндсэн дэд төрөлд хуваагдаад байна. L дэд төрөлд багтаж байгаа коронавирус нь хамгийн түгээмэл, нийт халдварын 70 хувьд нь тохиолддог. Харин S дэд төрөлд багтдаг мутацлагдсан коронавирус нь хавьгүй илүү аюултай бөгөөд нийт халдварын 30 хувийг эзэлж байна. Гэхдээ ингэж олон хэлбэр янзаар мутацлагдаж байгаа нь шинэ коронавирусийн эсрэг вакцин ба үр нөлөөтэй эм бүтээж боловсруулахад мэдэгдэхүйц нөлөө үзүүлэхгүй гэж Хятадын Шинжлэх ухааны академийн нарийн бичгийн орлогч Жоу Ци мэдэгдсэн байна.
Гэхдээ мэдэгдэхүйц нөлөө үзүүлэхгүй гэдэг нь огт нөлөөлөхгүй гэсэн үг биш юм. Сингапурын эрдэмтэд COVID-19-ийн мутацлагдсан коронавирусийн халдвар авсан зарим тохиолдолд уламжлал гэгддэг шинж тэмдгээс огт өөр шинж тэмдэг ажиглагдаж байгааг илрүүлсэн тухай “The Straits Times” сонин бичсэн байна.
Тодруулбал, COVID-19-оор өвдсөн өвчтөнд заримдаа Денге хумхаагийн шинж тэмдэг илэрч байж. Коронавирусээр өвдсөн хүний халуун нэмэгдэж, ядарч, бага зэргийн цэртэй ханиалгах үндсэн шинж илэрдэг атал онцгой тохиолдолд биеэр нь тууралт гарч, халуурдаг ч шинэ коронавирусийн үед ажиглагддаг бусад шинж тэмдэг огт илэрдэггүй байна. Ингээд зогсохгүй шинжилгээ хийхэд Денге хумхаагийн эерэг хариу үзүүлдэг байна. Иймд шинэ коронавирусийн шинжилгээг чанаржуулахад онцгой анхааралтай хандахыг эрдэмтэд уриалсан байна. Андуурч COVID-19-ийн эсрэг бус Денге хумаагийн эсрэг эмчилгээ хийх нь өвчтөнд өөрт нь төдийгүй эргэн тойрны хүмүүст аюултай гэдгийг анхааруулжээ.
Сэтгэгдэл (0)
Сэтгэгдэл бичигдээгүй байна