Малайзын цагдаагийн мөрдөгчийг 20 ба 37 настай Монголын иргэн хоёр эмэгтэйг хөл хорионы дэглэм шалгах пост дээр түр саатуулсны дараа хүчирхийлсэн хэргээр баривчлаад байгаа тухай malaymail.com сайт мэдээлсэн байна.
Энэ хэрэг баасан гарагийн орой болсон аж. Тухайн үед хоёр монгол эмэгтэй e-hailing –ээр түрээсэлсэн машинаар гэр рүүгээ харьж явтал коронавирусийн хорионы пост дээр байсан цагдаа зогсоосон гэж мэдүүлэг өгсөн байна.
Малайзын цагдаа эмэгтэйчүүдийг шаардлагатай бичиг баримтгүйгээр тээврийн хэрэгсэл жолоодож явааг илрүүлсний дараа ойролцоох зочид буудал рүү хүчээр авчирч, тэндээ хүчирхийлсэн байна.
Хэрэг гарсан Петалинг-Жая-ийн цагдаагийн даргын тайлбарлаж байгаагаар мэдээлэгчээс авсан мэдээллийн дагуу цагдаагийн тусгай баг зочид буудал руу дайралт хийж, хоёр эмэгтэйг аварсан байна.
Цагдаагийн дарга Ник Эзаник Мохд Фэйсал энэ талаар ярихдаа “30 орчим настай цагдаагийн мөрдөгчийг баривчилсан бөгөөд байцаалт авахын тулд тав хоног хорихоор болсон. Энэ бол Эрүүгийн хуулийн 376 –ийн 3 зүйл ангид бэлгийн хүчирхийлэл гэж тодорхойлогдсон хэрэг. Хүчирхийлэл үйлдсэн гэх бүх бүрэлдэхүүн ил байна. Хохирогчдод шаардлагатай бүх бичиг баримт байгаагүй нь үнэн. Тэд хууль бус секс наймаанд оролцдог байсан байж магадгүй ч энэ удаад бол хохирогчид гэдэг нь гарцаагүй” гэжээ.
Хэргийг үйлдсэн цагдаа нь хоёр монгол эмэгтэйг зочид буудалд хүч хэрэглэн саатуулж байсан. Бүр тодруулбал цагдаа нь тэднийг оройн 8 цагт пост дээр зогссоны дараа 24 цагийн турш зочид буудалд хүч хэрэглэн албадан барьж байхад нь цагдаа чөлөөлсөн байна.
Одоо хохирогчдыг шүүх эмнэлгийн үзлэгт оруулж, түр хугацаанд хамгаалалтад авах аж. Эмэгтэйчүүд англи болон малай хэлээр ярьж чадахгүй байсан тул тэдний найз гэх орчуулагчаас тусламж авах шаардлагатай болсон гэж цагдаагийн дарга мэдээлжээ.
Одоо эмэгтэйчүүдийг түр хорьж байсан өрөөнд шинжээчид ажиллаж байгаа юм байна.
Цагдаагийн дарга “Бид энэ хэрэгт маш нухацтай хандаж байгаа гэдгээ хэлье. Цагдаагийн ажилтан албан ажлаа гүйцэтгэх үедээ ийм хэрэг хийсэнд сэтгэл дундуур байгаа бөгөөд түүний эсрэг хуульд заасан хамгийн хатуу арга хэмжээг авах болно гэжээ.
Сэтгэгдэл (0)
Сэтгэгдэл бичигдээгүй байна